Tromsømi 2018-imi OL-imut aaqqissisuunissaq pilerigineqaqaaq
Tromsø qaasuitsup killeqarfianiit 350 kilometerinik avannarpasinnerusumiippoq, 60.000-inillu inoqarluni. Illoqarfimmi tassani ukiuunerani OL-ertoqassappat illoqarfiup innuttai marloriaatinngussapput.
Taamatut illoqarfimmi aaqqissuussisoqassappat ataqatigiinnermut pitsaasumik aaqqissuussisoqartariaqarpoq, tikeraanut pitsaasumik inissaqartitsisoqarluni, tassami timersortartut, tusagassiortut takornariallu inissaqartinneqartariaqarput tamannalu akikitsuinnaanavianngilaq.
Taamaattumik illoqarfimmi tamanna oqallisigineqaqaaq, aviisilu Bladet Tromsø aaqqissuussinerup taama angitigisup avatangiisinut aningaasaqarniarnermullu sunniutigisassai pillugit allaaserisaqaqattaarpoq.
Norgimi kingullermik ukiuunerani OL-imik aaqqissuussisoqarpoq 1994-imi Lillehammerimi OL-eqarmat.
OL-imik aaqqissuussinissamut Tromsø-mut unammillertut tassaapput München, Denver, Oslo, Lillehammer aamma Trondheim, kisianni Tromsøp ukiuunerani aputeqartuaannarnini iluaqutigisinnaavaa.
Silap kiatsikkaluttuinnarnera kikkut tamarmik oqaluuseraat Tromsømiillu tamanna atorluarneqarniarpoq:
- Siunnersuutitsinni silasiornikkut nalunaarsukkanik uppernarsaatissaqarpugut, Erlend Rian Tromsømi borgmesteriusimasoq oqarpoq taannalu Tromsøp olympiske komité-anut siulittaasuuvoq, nangillunilu:
- Siunissami ukiuusarnera qanoq issanersoq siulittuutigiuminaappoq, kisianni Tromsømut tunngatillugu taamanikkussamut ukiuunerani OL-ertoqarsinnaanera qularutissaanngilaq, Erlend Rian naggasiivoq.
