Ammassat pillugit ilisimatusaqqittut Polar Seafoodip kilisaataataata ikiussagai

Umiarsuaq Polar Amaroq ilisimatuutut misissuinissamut pilersaarummut peqataassaaq paasiniassallugu ammassat Islandip Kalaallit Nunaatalu imartaanni qanoq atugaqarnersut.

Polars Seafood naapertorlugu Polar Amaroq imaani ilisimatusartunut angallatigissallugu naleqquteqqissaarpoq. Aalisakkanik misissuiffeqarpoq pitsannillu sumiissusersiuteqarluni. Kalaallit suliffeqarfiutaannit peqataanissartik nuannaarutigigaat, siulersuisuni siulittaasoq Henrik Leth tusagassiuutinut nalunaarpoq.

Misissuinissat pingaaruteqartupilussuupput, minnerunngitsumik Atlantikup avannaani ammassattassat allatut agguaanneqartalertussaammata. Ilisimatuussutsikkut misissuinissamut Kalaallit Nunaata peqataanissaa pingaaruteqartupilussuuvoq nammineq aamma ilisimasagut annertusissammata, Henrik Leth oqarpoq.

Pilersaarut sapaatip akunnerata tulliani aallartinneqassaaq, tassani Polar Amaqqumi inuttaasut tallimanik amerlissapput, taakkulu tassaapput biologit  islandimiut.

Polar Amaqqup saniatigut islandimiut aalisakkanik misissuiffii marluk aamma peqataassapput.