Kilisaat akiliisitaasoq
Nanoq Seafoodimmi kilisaataataata Tasermiup Svalbardimi Kongsfjordenimi aalisarsimanera pissutaalluni Nanoq Seafood Norgemi naalagaaffimmit akiliisitaarujussuartussanngortinneqarpoq. Norgemi aviisit ilaat Klassekampen taama ullumi allaaserisaqarpoq.
Tasermiut Kongsfjordenimi immap naqqasiutinik kalittoq ilisimatuut Svalbardimi Ny Ålesundimi takusimavaat. Klassekampen taama allaaserisaqarpoq.
Tamaani oqartussat kilisaat Tasermiut attaveqarniarfigisimagaluarpaat iluatsissinnaasimanaguli. Oqartussarli sysselmandimik taasagaat siuttoralugu qulimiguulik atorlugu Tasermiunut ikisoqarsinnaasimavoq. Norgemi sineriammik nakkutilliisut akunnialunnguit apuummata kilisaat pisortatigoortumik tigusarineqarpoq Svalbardimilu Ny Ålesundiliaanneqarluni.
Tasermiut Kongsfjordenimi raajanik 2 tonsinik pisaqareersimasoq Ny Ålesundiliaanneqarpoq.
Kongsfjordenimi immap naqqata Tasermiut immap naqqasiorluni kilisassimaneranit innarlerneqarsimasinaanissaa ilisimatuut ernummatigaat.
- Ilisimatuut Kongsfjorden tamakkerlugu misissuisarfigaat. Atortorissaarutit malussarniutit tamani tamaani inissinneqarsimapput, uumassusilinnik immallu allanngorarnera naqqanillu misissuisarlutik, Ole Øiseth, suliffeqarfimmi ilisimatuutut misissuiffiusumi pisortaq oqarpoq.
Kongsfjorden eqqissisimatitaasoq ilisimasimanagu, Tasermiuni naalagaq killisiorneqarami oqarsimavoq. Kilisaat 140.000 koruuninik akiliisitaasussanngortinneqarpoq, ilisimatuullu atortuisa aserorterneqarsimaneri pissutaallutik taarsiivigitinnissamik taassuma saniatigut aamma piumasaqartoqarsinnaalluni. Umiarsuaatileqatigiiffiup akiliisussanngortinneqarneq akuerisimavaa.
