Transparency partiinut: Qinigassanngortitassassinnik toqqartuilerussi mianersorisi

Inatsisartuni ilaasortanngortussat maligassiuisuusariaqarput. Suliniaqatigiiffimmi Transparency Greenlandimi taama isumaqarput. Partiit qinigassanngortitassaminnik toqqartuinerminni mianersornissaat suliniaqatigiiffiup kajumissaarutigaa.

Aleqa Hammondip ilaqutaasalu unnukkorsiorlutik nereqatigiinneri, unnuami kingusissukkut immiaarartornerit, mamakujuit minibarimiittullu imaat akileraartartunit akilerneqarsimapput. Suliamut tunngasumik pisortat paasissutissaataannik tamakkiisumik allakkatigut paasissutissiisuni, KNR-ip pissarsiarisimasaani misissuinermi tamanna paasinarsivoq.

Tamatuma saniatigut ilaqutariit arlaleriarlutik timmisartumut ilaaneri akilerneqartarsimapput. Ullormi naatsorsuuserisut kukkunersiuinerminnut atatillugu isornartorsiuillutik nalunaarusiormata, Aleqa Hammondip akiligassani aatsaat akilersimavai.

Ilisimaneqartutut Kuupik V. Kleistip nunatta karsia aningaasanik atukkaminik akiliigallartarfittut aamma atorsimavaa.

Transparency Greenlandip siulersuisuini siulittaasup, Anita Hofferip, nunatta karsiata siunissami atornerlunneqannginnissaa anguniarlugu, aammalu qanitanik salliutitsisarnerup pinngitsoortinnissaanut siunnersuuteqaqqullugit politikerit maanna kajumissaarpai.

- Nunatsinni qanitanik salliutitsisarnerup peqquserluttuliortarnerullu akiorniarneqarnissaannut politikerit tigussaasunik siunnersuuteqaqqugaluarpagut.
 
Innuttaasut qinigaat maligassiuisuusariaqarput, Transparency taama isumaqarpoq. Taamaammat suliniaqatigiiffiup kikkut Inatsisartunut qinigassanngortissanerlugit eqqarsaatigilluaqqullugu partiinut kajumissaarutigerusuppaa.
 
- Qinigassanngortittut kikkuunerinik partiit misissuinissaat kissaatigaarput. Parteertik sinnerlugu qinigassanngortinnissamut suut piumasaqaatiginiarpaat. Siornatigut iliuuserisimasaat misissortariaqarpaat qinigassanngortinnissamullu naleqquttuunersut isummerfigalugu.
 
Kingullertigut eqqunngitsuliortoqarsimagaluartoq, Anita Hoffer isumaqarpoq pissutsit ilorraap tungaanut ingerlasut. Pisortallu aningaasaataanik atornerluisoqarsimaneranut qisuariaatit sakkortuut ilorraap tungaanut ingerlasoqarneranut ersiutitut isigai.


- Tunngaviatigummi isumaqarpugut innuttaasut akerliliisinnaanngornerat pitsaalluinnartoq, oqarlutik pisoq akuerisinnaanngilarput. Aamma naalakkersuinikkut sulinermi kinguneqartinneqarnera takullugu pitsaalluinnarpoq.

- Taamaammat innuttaasut alaatsinaannissaat Transparencymi isumalluarfigaarput. Uagut tusagassiorfiillu peqatigaluta nakkutilliisuussapput. Taamaalisoqarneramini politikerinut piumasaqaataasut sakkortunerulissapput, Transparency Greenlandimi siulersuisunut siulittaasoq isumalluarpalulluni taama naggasiivoq.
 
Oqallinnermik aallakaatitassiaq Qulaarpaa KNR-TV-p unnugu aallakaatissavaa. Mamianartunik iliortoqaqqinnissaa pinaveersaartinniarlugu politikerit qanoq iliuuseqarniarnersut ilaatigut paasiniarneqassaaq. Qulaarpaa kalaallisut nal. 19.30 danskisullu nal. 20.30 aallakaatinneqassaaq.

Isummersuutit


 

Pages