Transparency Greenland aasaanerani pikkorissaanermut ilinniartunik peqataatitsissaaq
Nuka Nathanielsen Inga Lisa Olsenilu suliarilluakkanik qinnuteqaateqarnermikkut taperneqarput, tapiissutillu peqataanermut akiliutinut, angalanermut najugaqarnermullu aningaasartuutinut matussutissatut atorneqassapput. Peqataasussat pingajuat tassaavoq Transparency Greenlandimi ilinniartutut ikiortaasoq, Mitdlarak Lennert.
Transparency International ukiut tamaasa pikkorissaaneq sapaatit akunneranik ataatsimik sivisussusilik ”Summer School of Integrity” Litaunimi Vilniusimi ingerlattarpaa. Pikkorissaaneq ukiormanna juulip arfineq-pingajuanit 14-ianut ingerlanneqassaaq.
Pikkorissaanerup siunertaraa ilinniartut, ilinniagartuut inuusuttullu inuussutissarsiutinik ingerlataqartut atorfimmi ileqqorluttumik ingerlatsisarnerup akiorniarneqarnissaanik suliaqarnermik paasisaqarnissaat. Pikkorissaanermi atorfimmi ileqqorluttumik ingerlatsinermut patsisaasartut inuiaqatigiinnilu ammanerusumik ingerlatsisoqarnissaanut sakkussanik pissarsissapput.
Pikkorisaaneq TI Summer School pingasunik immikkoortoqarpoq, pisortani ingerlatsineq, namminersortuni ingerlatsineq kiisalu innuttaasunik peqataatitsineq. Immikkoortuni tamani ileqqorluttuliortarnerit assigiinngitsut isumasiorneqassapput ileqqorluttuliornerullu akiorniarneqarnissaannut sakkussat tigussaasumik misilittarneqassallutik. Nunatsinnit peqataasut pikkorissareerunik nalunaarusiussapput, soqutiginnissinnaasut tamarmik pikkorissarnerup imarisaanik pissarsiaqaqqullugit.
Pikkorissarnermut peqataasut GrønlandsBANKEN-ip Inuussutissarsiornermut aningaasaateqarfianit aningaasaliiffigineqarput.
