Umiatsiaq Nuup Kangerluani ajutoormat arnaq inuusuttoq ajunaartoq
Nuup Kangerluani umiatsiaaraq unnuaq ajutoormat arnaq inuusuttoq ajunaarpoq. Kalaallit Nunaanni Politiit pigaartuisa pisortaat Carl Sværd taama ilisimatitsivoq:
- Umiatsiaq sukkasuuliaq, issimasut atttartorsimasaat, ajutoorsimavoq. Sukkasuumik ingerlaartillutik sikuminermut aporsimanissaat ilimagaarput. Carl Sværd KNR-imut oqarpoq.
Inuit arfineq-marluk umiatsiamiissimapput, taakkunanngalu pingasut immamut nakkarsimapput.
Inuk ataaseq sikumut qaqisinnaasimavoq, politiinullu unnuaq nalunaaqutaq marluk qaangerlugit taneq marlunngulersoq sianersinnaasimalluni.
Umiatsiaq pineqartoq pineqaatissinneqarsimasunut inissiisarfittaap Sermitsiallu akornanni ajutoorsimasoq arnap taassuma kalerriutigisinnaasimavaa.
Pineqaatissinneqarsimasunut inissiisarfiup videomik nakkutilliissutai atorlugit umiatsiap sumiissusersineqarnissaa taava kissaatigineqarpoq, annaassiniat ornigutipallassinnaaniassammata.
Issittumi Sakkutooqarfiup annaassiniarnermut umiatsiaa sukkasuuliaq, politiit umiarsuaat qatserisartullu umiatsiaat Targa annaassiniarnermut peqataapput, ajutoorsimasullu kalerriisoqarnerata kingorna minutsit 45-t qaangiummata sumiissusersineqarput, Nuummullu ullaassaq nalunaaqutaq sisamat missaanni apuunneqarsinnaasimallutik.
Arnaq inuusuttoq immamut pisimasoq toqungasoq annaassiniat apuummata paasineqarpoq, napparsimmavimmullu apuummata toqusimasutut nalunaarutigineqarluni.
Ilaasut sinneri arfinillit Dronning Ingridip Nappparsimmavissuanut unitsinneqarput. Ataaseq niuiarsimavoq, allallu assigiinngitsunik ajoqusersimallutik, politiit pigaartuisa pisortaat Carl Sværd oqarpoq.
- Imigassartorsimalluni umiatsiamik ingerlatsisoqarsimanissaa pasitsaapparput, ilaasullu marluk imigassartorsimatillutik umiatsiamik ingerlatsisimasutut pasisaapput, mianersuaalliorlunilu toqutsisimasutut, ulorianartorsiortitsisimasutullu aamma pasineqarlutik, Carl Sværd oqarpoq.
