TP: Hans Enoksen aatsaat taamaaliulinngilaq
-Siullermiilinngilaq naalakkersuisut siulittaasuata tusagassiuutinik taama isornartorsiusarnera, illuinnaarsiornerarlugit aammalu peruarsiutissanngorlugit saqqummiussisarnerarlugit. Ilaanni isumaqarnartarpoq immaqa tusagassiuutinit nammineq inuttut isornartorsiorneqarnertut tiguneqartartut, kisianni tusagassiuutit suliassarivaat nakkutilliisuussallutik equngasunillu inuiaqatigiinni tikkuartuissallutik, Mariia Simonsen oqarpoq.
Qinikkat aalajangiisartuummata inuppassuarnut sunniuteqartunik, taamaattoqartillugulu politikerit isornartorsiorneqarnissartik tigusinnaasariaqaraat oqaatigaa, assigiinngitsut pissutsilluunniit qulaajarneqaraangata saqqummiunneqaraangataluunniit.
- Tusagassiuutit soorunami kukkujuitsuunngillat kisianni demokratiimi inuutilluta tusagassiuutini saqqummertoqartarpoq immaqa ilaatigut illuinnaasiortutut taaneqarsinnaasunik. Kisianni tusagassiornermi suleriaatsit tassa taamaapput, kisiannili aamma oqallinnermik kinguneqartarlutik, Mariia Simonsen oqarpoq.
Hans Enoksenip pisuutitsiniartarnera ilumoortortaqanngila? Aamma tusagassiortut nuanninngitsussarsiorpallaartarpat?
- Naalakkersuisut Siulittaasuata pisimasoq eqqartugaa tassaavoq DR-ip TV-kkut piviusulersaarusiaa, pissutsinik assigiinngitsunik inuit atugaannik aammalu qinikkat ilaasa immaqa pitsaavallaanngitsumik iliuuseqarnerannik imaqartoq. Taanna oqallinnerujussuarmik kinguneqarpoq, isumaqarpungalu tamanna tikilluaqqunartoq. Takutitsivorlu qanoq pingaartigisoq tusagassiuutini pissutsinik eqeersimaarfiginninnissaq, equngasunillu uparuaasarnissaq, TP-p siulittaasua Mariia Simonsen naggasiivoq.
Mariia Simonsen aamma oqarpoq, inuiaqatigiinni eqqumaffigisariaqagassarpassuaqarmat DR-ip piviusulersaarusiaa ”Kalaallit Nunaannit qimarranneq” nunatsinni tusagassiortut ilinniarfigisariaqaraat.
