Torrutiinnarlugu quiasaarineq iluatsilluarpoq

Jens-Jakob Lennert-Sandgreen quiasaarisartutut tusaamaneqalerpoq torrutiinnarlugu quiasaarineq nunatsinni siullermeerutaasoq isiginnaarianik illartitsilluareersoq.

Aallarnisaasartoq taanna inuusuttoq torrutiinnarlugu quiasaarinissamik isumassarsisuusoq malittuinnarnik quianartuliorsinnaavoq - taannaannaanngilarli: Isiginnaariat aamma quiagaat.

Quisaarineq sioqqullugu pissamaarneq annertuvoq billetit 508-at tamarmik sisamanngornermi unnukkug tunineqarmata arlallillu nunguussaasut isinngitsoorput.

- Assorsuaq oqiliallaqqavugut aamma inuit assorsuaq tigulluaramikku ingerlaannaq illalerlutik, Jens-Jakob Lennert-Sandgreen KNR-imut oqarpoq.

Hans Jukku illartitsivissorpoq
Jens-Jakob Lennert Sandgreen quiasaarinermik nammineerluni aallarniivoq. Politikerit, Thailandimiut, KNR allaammi Sisimiormiut quianartuliaani qajassuunneqanngivipput.

Miké Fencker Thomsen filmimi qiiaamminartuliami "Qaqqat alanngui"-ni inuttaanini nangittuusiinnarpaa. Qivittoqanngilarmigooq - naapissimanngikkaanni, oqarpoq.

John G. Sandgreen mianersortunnguamik tikilluaqquneqarpoq, inuttaatalu isiginnaariat qutsavigai neriunnerarluni illartuusaaginnaratik aamma illavittarsimassasut.

Aliikkusersuineq nalunaaquttap akunnera sinnilaarlugu sivisussuseqartussaagaluaq akunnerit marlungajaat ingerlavoq. Kisianni suna ajortussaq Hans Jukku Noahsen ilisarnartut nipaannik ilaarsillunilu kiinnani timinilu atorlugit illartitsivissormat. Iliuusaalu isiginnaariat erngerlutik ilisarsiffigisarpaat.

Kalaallit Nunaanni torrutiinnarlugu auiasaarnerit siullersaat, aamma kakkununnga tunngasunik quiasaariffiungaatsiartoq, ingerlateqqinneqassaaq Katuami sisamanngorneq novemberip pingajuat.

Tumit Productions video-liorpoq pilersaarutaavorlu ukiortaareerpat dvd-iinngorlugu saqqummersinneqassasoq.