Toqutsisutut pasineqartoq tigusarineqarpoq

Angut 19-inik ukiulik Sisimiuni, 29-inik ukiulimmik Louise Hegelundimik, qaammatit sisamat matuma siorna toqutsisimasutut pasineqarpoq. Politimesterip tullersortaata Morten Nielsenip radioavisimut uppernarsarpaa, angut inuusuttoq maanna tigummigallarneqartoq.

- Angut 19-inik ukiulik ippassaani marlunngormat juunip ulluisa aqqaneq-aappaanni tigusarineqarpoq, ippassarlu pingasunngornermi matoqqasumik killisiorneqarluni, Morten Nielsen ilisimatsitsivoq.

Angutip inuusuttup toqutsisimasutut unnerluutigineqarnerminut atatillugu sapaatip-akunnerini sisamani tigummigallagassanngortitaanini akuerivaa. Politimesterilli tullersortaa erseqqissaavoq. suliamik misissueqqissaarneq pillugu annerusumik oqaaseqarsinnaanani.

Louise Hegelund 29-inik ukioqartoq, Sisimiunilu HTX-imi ilinniartuusoq, kollegiami najugaqarfimmini savimmik kapineqarsimalluni toqungasoq arfininngornermi februaarip ulluisa pingajuanni nassaarineqarpoq.

Danmarkimi politiit paasiniaasartoqatigiit nunatsinnilu politiit taamanili kina toqutsisuunersoq paasiniarlugu misissuipput.