Toqutsisutut unnerluutigineqartussap eqqartuunneqarnissaa qaammatip ataatsip ingerlanerani pisinnaassasoq, Politimesteqarfimmit naatsorsuutigineqarpoq.
Sisimiut Eqqartuussiviani eqqartuussinissaq ingerlanneqassasoq, Politimestereqarfimmiit aamma ilimagineqarpoq.
Toqutsisimasutut pasineqartoq 2007-imi juunip qaammataani tigusarineqarpoq. Angut toqutsisimasutut pasineqartoq toqutsinerup nalaani 19-inik ukioqarpoq, massakkumullu qaammatit 14-inissaat politiiniit tigummigallarneqarluni.
Toqutsisimasutut pasineqartoq sumi tigummigallarneqarnersoq politeeqarfimmi assessorip Henrik Pass-ip oqaatigisinnaannginnerarpaa.
-Suliaq sakkortuvoq, Henrik Pass oqarpoq, nangipporlu:
-Unnerluutigineqartup eqqarsartaatsimigut misissorneqarnera, nakorsallu eqqartuussinermi siunersiugaasartut isumaat tusarniarneqaqqaartariaqarnikuummata, qaammatit 14-it tigummineqareerluni toqutsisutut pasineqartup eqqartuunneqarnissaa aatsaat aallartinneqartussanngorpoq.
Kalaallit Nunaanni inuartut ukiut qulit tikillugit isertitsivimmiittussanngortinneqarsinnaasarput, imaluunniit piffissaligaanngitsumik Herstedsvesterimi inissinneqarsinnaasarlutik.