Toqutsisimasutut unnerluutigineqartoq pinngitsuutitaavoq

Angut 65-inik ukiulik toqutsisimasutut pasineqarluni Nuup Eqqartuussiviani ullumi eqqartuussinermi pinngitsuutinneqarpoq.

Aasaq juullip qaammataani Nuup ilaani Nuussuarmi arnat marluk sapaatip akunnneranik ataatsimik nikingassuteqarlutik toqungasut nalunaarutigineqarput toqunneqarsimasorineqarlutillu. Arnap aappaata 54-inik ukiullip inooqataa 65-inik ukioqartoq aasarli, toqusoqarsimatillugu misissuisartut misissuineranni politiinit tigummigallarneqarpoq, toqutsisimasutut pasineqarluni. Ullaap tungaani eqqartuussinermi Danmark-imi toqusoqarsimatillugu paasiniaasartoq Jørgen Lange Thomsen TV atorlugu nassuiaatinneqarpoq, arnap toqunerani aasaq paasisani nassuiarlugit. Eqqartuussisut aalajangiiniarnerminni toqusoqarsimatillugu paasiniaasartup nakorsap nassuiaataa tunngavigivaat . Arnaq 54-nik ukiulik aasaq imigassartorsimavoq, ullullu ingerlanerani arlaannit toqqusassineqarsimavoq kingornalu toqqutigisimagunarlugu. Unnerluussisup Nuummi Politiip Poul Petersen-ip angut 65-inik ukiulik ukiunik tallimanik sivisussulimmik pineqaatissinneqarsimasut inissiisarfianniittussanngorlugu pineqaatissinneqarnissaa kissaatigigaluarpaa.

Toqusoqarsimatillugu paasiniaasartup nakorsap Jørgen Lange Thomsen-ip taamatullu Nuummi nakorsap Henning Sloth Pedersen-ip qulakkeerlugu uppernarsarsinnaasimanngilaat, arnap 54-inik ukiullip sunarpiaq toqqutigisimaneraa. Angut 65-inik ukiulik eqqartuussineq naammassimmat iperagaavoq, unnerluussisulli tassalu politiit suliaq nunatta eqqartuussivianut ingerlateqqippaat.