Toqutsisimasunik sakkortuumilluunniit pinerluuteqarsimasut naapinnissaat akuersaartariaqarpoq

Toqutsimasunik sakkortuumilluunniit pinerluuteqarsimasunik naapitsinissamut innuttaasut akuersaalernissaat pisariaqarpoq. Inuiaqatigiit taama ikitsigaluta allatut ajornarpoq, taama oqarpoq tarnip pissusaanik ilinniagalik Else Poulsen
Allattoq Jaaku Lyberth
januaarip 08-at 2008 10:37

Tusarnaartartutta ilaat toqutsimasumik aammalu pinngitsaaliilluni arnerisimasumik, politiinit tigummigallagaasunik aneernissamik akuerineqarsimasunik, aqqusinermi naapitsilluni misigissutsimigut attortissimavoq. Tassunga atatillugu Else Poulsen oqarpoq, tupinnanngitsoq taamatut misigissuseqarnissaq, kisiannili pingaanerpaajusoq akuerinissaa namminerlu qanoq iliuuseqarfiginissaa.

-Pinngitsuinnatik inuiaqatigiinnut uteqqittussapput. Inuiaqatigiinni ikittunnguugatta ippigisarpagut tamakkua kisiannili nukissaqarfigissavagut iliuuseqarfigisinnaanngorlugit, taama aamma oqarpoq Else Poulsen.

Aamma erseqqissarpaa tamatta ajortuliorsinnaagatta, kisiannili pingaartuusoraa qanorluunniit ajortuliorsimagaluarutta ajunngitsumut alloriaqqisinnaanerput, ingammik inuiaat taama ikitsigaluta akuersaarnerunissarput assigiinngitsunik pisariaqarlernikuunerarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq