Toqutsinertut misissuinermi tallimat tigummigallarneqarput
Pisoq toqutsinertut misissuivigineqassasoq politiit ippassaq aatsaat aalajangiuppaat.
Politiit pisumut paasissutissanik tunniussinissaminnut maannamut tunuarsimaartorujussuugaluarput, misissuinissaq pinerullugu, ilaqutaasullu aamma eqqarsaatigalugit.
Toqutaasorli tassaasoq angut 26-nik ukiulik tamanut ullumi aatsaat saqqummiunneqarpoq, angutillu tallimat, 16-inik, 18-inik, 19-inik, 29-nik 32-nillu ukiullit, matoqqasumik sisamanngormat killisiorneqareerlutik, maanna tigummineqarallartut.
- Pisoq toqutsinertut maanna misissuivigineqaleraluartoq, angutit tallimat sumorpiaq pasisaanersut annertunerusumik maanna oqaaseqarfigisinnaanngilara, vicepolitiinspektør, Viggo Johansen, Radioaviisimut ullumi oqarpoq.
Inuit Blok 17-ip eqqaani pisumut ilisimannissinnaasut politiinut suli saaffiginnissinnaasut Politiit erseqqissaatigaat.