Toqutsinermut akisussaasuusut ujarneqarput

Ruslandimiut sakkutuuisa Tjetjeniami inuit pisinnaatitaaffiinik unioqqutitsisimasutut saqqummiulugit tusagassiisarsimasoq Anna Politkovskaja aallaaneqarluni Moskvami ippassaq toqunneqarpoq.

Tusagassiortumik Anna Politkovskajamik toqutsineq USA-mi tuppatigineqaqaaq, akisussaasullu eqqartuussivinnut sassartinneqarnissaat piumasarineqarluni.

- Tupaqqaqaagut, soqqusaatsulionerlu assut akerlilerlutigu, USA-mi naalakkersuisut oqaaseqartartuat Sean McCormack oqarpoq, Politkovskajalu ataqqineqarluartutut taallugu, qasusuillunilu itisilerilluni tusagassiisartuusimanerarlugu.

48-nik ukiulik Anna Politkovskaja siornatigut toqumik siorasaarneqartarsimavoq, Ruslandillu præsidentia Vladimir Putin pillugu atuakkiorsimalluni.

Ruslandip Tjetjeniami ajortuliortarsimanera atuakkiami saqqummiunniarneqarpoq, Politkovskajalu elevatorip iluani sisamariarluni aallaaneqarsimasoq ippassaq nassaarineqarpoq.

Tusagassiortumik toqutsineq iternga tikillugu misissuiffigineqartariaqartoq EU-p piumasaraa, qaammatinilu makkunani EU-mi siulittaasuusoq Finland nunat ilaasortaasut 25-iusut sinnerlugit piumasaraa akisussaasuusut pillagaasariaqartut.

Sovjetunioniusimasup isasoornerata kingorna tusagassiortut 42-t Ruslandimi toqutaasimapput, Putinilu ukioq 2000-imi præsidentinngormalli tusagassiortut aqqaneq-aappassaat toqutaalluni.

Danmarkip nunanut allanut ministreriata Per Stig Møllerip toqutsinermut akisussaasuusut nassaarineqarnissaat pillagaanissaallu aamma piumasaraa.