Toqutsinermik paasiniaaneq nammassivaat
Toqutsisup killisiorneqarnerani paasinarsivoq Ole Markussen unnukkut arfineq-pingasut eqqaanni 24-nik ukiulimmit immannguaannaq ilisarisimasaminit ujarneqarsimasoq. 24-nik ukiulik imigassartorusussimavoq, kisiannili itigartinneqarluni aneqquneqarlunilu. Angutip inuusuttup itigartitaagami Ole Markussen tunuaniit ledningimik qimippaa kingornalu toqqusaavi pilallugit.
Toqutami toqqusaavisa pilannerinut angutip inuusuttup politiinut nalunaarutigineqarnissaminut annilaanganini tunngavilersuutigaa.
24-nik ukiullip tamatuma kingorna toqutaminit aningaasat amerlanngitsut tillippai. Aningaasanik pissarserusunneq toqutsinermut pissutaasutut ilimanarnerpaatut killiffigaarput, politiit pisortaat Bo Chr. Borgnæs radioaviisimut oqarpoq.
24-nik ukiulik politiinit ilisimaarineqarpoq, annikitsuinnarmilli pinerluteqarsimasutut. Taamaattorli politiit, taamaalinerani aallartiffissaqannginnamik toqutsisimasumik ujarlereernermik kingorna angutip taassuma oqaloqatiginissaa toqqarsimavaat, paasinarsivorlumi tamanna isumassarsiatsialaasoq, angut inuusuttoq toqutsisutut nassuermat.
Uummannami politiit Danmarkimiit pinerlussimasunik paasiniaasartumik Nuumminngaanniillu politiini teknikerimik ikiortissarsisimapput.
Angut Uummannami suli tigummineqarpoq, sapinngisamilli piaarnerpaamik sinerissami pinerluuteqarsimasunut inissiisarfimmut nuunneqassalluni.
- Tamatumunnga peqatigitillugu toqutsisoq 24-nik ukiulik eqqartuunneqannginnermini eqqarsartaatsimigut misissorneqassanersoq isummertoqassaaq, politiit pisortaat Bo Chr. Borgnæs naggasiivoq.
