Toqutsineq: Pasineqartut ilaat iperagaavoq
![](/sites/default/files/styles/image_934x467/public/article_images/politiskilt_komprimeret.jpg_1.jpg?itok=RnpOOAZ4)
Nuummi Radiofjeldimi toqutsinermut atatillugu pasineqartut ilaat ataaseq aggustip qeqqani Nuummi politiinit iperarneqarpoq. Taamaattoq pasisaasut allat sisamat tigummigallarneqarnerat septemberip 11-anut 13-anullu sivitsorneqarpoq.
- Suliap aallartinnerani tigummigallarneqalersut tallimaasut ilaat ataaseq iperarparput. Kisianni suli pasisaasunut ilaavoq, Nuup politiivini vicepolitikommisær Janus Eigaard KNR-imut oqarpoq.
Angut 26-nik ukiulik Nuummi Radiofjeldimi blok 17-ip silataani toqugasoq juunip 20-ani siumorneqarpoq.
Aasap ingerlanerani inuppaaluit politiini apersorneqarsimapput. Politiilli suli oqaatigisinnaanngilaq toqutsineq qanorpiaq pisimanersoq.
- Toqutsinerup qanorpiaq pisimanera pillugu suli oqaaseqarsinnaanngilagut. Taamaallaat oqaatigisinnaavarput paasiniaaneq suli ingerlasoq, Janus Eigaard oqarpoq.