Toqunartut avatangiisinut ulorianaatillit qimminut ajoqusiisarput

Toqunartut avatangiisinut ulorianaatillit tusaamanerlugaasut, soorlu DDT aamma PCB, anorimit immallu sarfaanit Kalaallit Nunaannut ingerlanneqartartut Kalaallit Nunaanni uumasunut assorsuaq ajoqusiisartut, paasisat nutaat ersersippaat.

Kitaani qimmit qimuttut arlalippaaluit Syddansk Universitetimi ilisimatusartunit ukiut marluk ingerlaneranni uumasuutigineqarsimapput nerukkarneqartarlutik naggataatigullu toqunneqarlutik.

Qimmit 24-it ilisimatusartunit tiguneqarput marlunnut avinneqarlutik assigiinngitsorpassuarnillu nerukkarneqartarlutik.

Siulliit nalinginnaasumik nerukkarneqartarput, aappaalli tikaagulliup orsuanik nerukkarneqartarlutik, tassami naluneqanngilluarmat toqunartut avatangiisinut ulorianaatillit ilaatigut arferit orsuanni unerartinneqartartut. Tassalu taamaalilluni tamanna qimmiaqqat angutivissat kinguaassiuutaannut kiisalu qimmit hormoniinut assigiinngitsunut sunniuteqartarnersoq misissorneqarpoq.

Paasisat maluginngitsuugassaanngillat, ilaatigullu uppernarsineqarluni qimminit orsoqarluartunik nerukkarneqartanngitsuninngarnit issui minnerulersimasartut.

Qimmit arferup orsuanik nerukkarneqartut aammattaaq timaasa akiuussutissaat minnerulersarpoq aammalu tingummikkut tartumikkullu ajoqusersimasarlutik.

- Qimmit 24-t qularnaatsumik paasissutissiinngikkaluartut taamaattoq qimmit ajoqutigiligaat soqutiginaateqarput, tassami paasisat siornatigut nannut uumasullu allat taamaattunik nerisalinni kingulliit ilaanni paasineqartunut assingummata. Tassa, toqunartut avatangiisinut ulorianaatillit assorsuaq ajoqusiisarput, ilisimatusartut ilaat Maja Kirkegaard videnskab.dk-mut oqarpoq.

Taassuma aamma tikkuarpaa toqunartut qimminut nannunullu ajoqutaanerusarpata taava inuit qanoq sunnerneqartarnerat ilisimatusarfigissallugu ajornannginnerulissasoq.