Toqumut pillaasarneq suli atugaaqaaq
Toqumut pillaasarneq suli atugaaqaaq.
Inuit 1.500-t toqumut eqqartuussaallutik nunarsuarmi tamarmi ukioq kingulleq toqutaasimapput, taamaakkaluartorli ukiumut siulianut sanilliullugu ikinnerusimallutik, Inuttut Pisinnaatitaaffinnik Illersuiniaqatigiiffiup naatsorsugai taama takussutissiipput.
Saddam Husseinip inimi taartumi betoniinnaasumi ukioq kingulleq nivinngagaanera pillaasarnermi oqaluuserineqartut annersaraat, siornatigut kisermaassilluni naalakkersuisuusimasup nivinngagaanera 2006-imi pisortatigoortumik toqumut eqqartuussaallutik toqutaasunit 1,500-nit Saddam Hussein tusaamaneqarnersaavoq, Inuttut Pisinnaatitaaffinnik Illersuiniaqatigiiffiup, Amnesty Internationalip, naatsorsuuusiaani, ukiumut siulianut sanilliullugit 500-nik ikinnerusimallutik. Inuutut Pisinnaatitaaffinnik Illersuiniaqatigiiffimmit oqartoqarpoq, kisitsisit amerlanerujussuusinnaagaluartut pisortatigoortuunngitsut ilanngunneqaraluarpata.
Toqumut eqqartuussiiluni toqutsinerit 90 procentinit samerlanerusut nunat arfiniliinnaat atortarsimavaat,
tassaasut, Kina, Pakistan, Iran, Irak, Sudan aamma USA.
Kina innuttaminik nunarsuarmi amerlanerpaanik toqutsisarsimavoq, nuna taanna siuttuuvoq, nalunaarsorneqarsimassut 1000-init amerlanerit toqunneqarsimammata. Kisitsisilli eqqortut Kinap naalagaaffianit isertugaammata upperineqarsinnaanngillat, ilimagineqarporli Kinami inuit 6000-it toqumut eqqartuunneqarlutik toqutaasimanissaat.
USA Nunani Killerni pisarnertut uparuartorneqartuarpoq toqumut eqqartuussisarneq USA-p naalagaaffiani ingerlanneqartuarmat. Uparuartorneqaatigisartagaali ataaseq allanngortinneqarsimavoq, tassalu meeqqanik toqumut eqqartuussisarneq, USA-p eqqartuussiviisa qullersaannit 2005-imi aalajangiivigineqarpoq, naalagaaffiup inatsisaanut naapertuutinngitsoq, meeqqanik 18-it inorlugit ukiulinnik toqumut eqqartuussisarneq. Meeqqanik toqutassanngortitsisarneq Iranimi ullutsinni suli ingerlanneqarpoq. USA-mi toqumut pillaasarneq ukiut 30-t ingerlaneranni ukioq kingulleq atsaat taama appasitsigaaq.
USA nunani suliffissuaqarfiusuni kisiartaalluni toqumut pillaaneq ajorpoq.
Japanimi ullumikkuinnaq inuit pingasut toqumut eqqartuussaallutik nivinngagaasut nalunaarutigineqarpoq.
