Toqqaannartumik Ilulissaniit aallakaatitsiniarput

Tassa tv-qarfiup NBC-p aallakaatittagartik ”The Today Show” illoqarfimmit toqqaannartumik aallakaatilerpagu – aamma nunarsuarmi silap pissusaata allanngoriartorneranit eqqugaasunit sumiiffinnit marlunneersunit aallakaatitsisoqassaaq.

Ippassaq unnukkut Amerikamiut qilanaartuuserneqarput, Ilulissaniit aallakaatinneqartussamit qilanaartuusiisoqarmat. Tamanna pivoq aallakaatinneqartartoq ”Sunday Night Football” 17 miliuuninik isiginnaartoqartartoq aallakaatinneqaleruttortoq.

Ilulissanit aallakaatinneqartussat piffissami sivitsortumi piareersarneqarput – sapaatip akunnerata naanerani aallakaatinneqartartumi ”The Today Show”-imi aallakaatitsisartup aappaa – Matt Lauer – Ilulissanut tikippoq. Taanna kingusinaarluni tikippoq, tassa Air Greenlandip timmisartua King Air napparsimasumik angallassisariaqalermat. Tamanna NBC-mut ernumatitsileraluarpoq – paasitinneqarpulli tamakkua Amerikamiut tusaamasarsuit angalanissaannit maani pingaartinneqarnerusartut.

Kisianni Matt Lauer Ilulissanut apuutereerpoq – aallakaatitsinissarlu tamarmi piareerpoq.

Ilulissaniit aallakaatitsinikkut silap pissusaata allanngoriartornera sammineqassaaq, Ilulissat saniatigut aallakaatitsivigineqartussat tassaapput Ecuador aamma Sikuiuitsoq Kujalleq.