Tony Blair aappaagu tunuarniarpoq
Tuluit Nunaanni naalakkersuisut pissaaneqarniutereersullu ministeriuneq Tony Blair maajimi tunuarniaannaleqaaq.
Partiimi Labourimi ilaasortat arlallit ministeriunertik ulluni kingullerni tunuaqqusaqattaarpaat. Tuluillu Nunaanni qinersisoqaqqilerpat Labourip ajugaanissaralua ministeriunerup tusaamaneqarnerlunnini peqqutigalugu pinngitsoorteratarsinnaagaa arlalinnit ilimagineqarpoq.
Tuluit Nunaanni naalakkersuinermik suliaqartut 16-t Tony Blairimut akerliullutik ippassaq tunuarniuteqarput. Tony Blairip paarlatsissamisut isigisani aningaasaqarnermut ministeri sivisungaatsiartumik ippassaq ataatsimeeqatigaa.
- Ataatsimiinnerminni imminnut tigunngujoortuinnaallutik oqqapput. Ataatsimeereerlutik anillakkamik Tony Blair pinngitsaalilluni tunuarniuteqaqqusaanerarpoq, aviisi The Guardian allappoq.
Tony Blairip maajip aallaqqaataani aappaagu ukiuni qulini naalakkersuisuni suleqataasimanini taamaalilluni malunnartissinnaalerpaa.
Tony Blair Irakimi sakkutuuliinermi kingorna tusaamaneqarnerlukkiartuinnavippoq. Irakimi sakkussat navianarluinnartunik Tony Blairip tunngavilersuinera innuttaasut amerliartuinnartut upperineqarunnaariartorpoq. Irakimi tuluit 117-t manna toqutaareerput akersuunnerillu naasuitsutut tulunnit isigineqarput.
