Tommy Marøp tunuartinneqarnissaa Demokraatit piumasariniarpaat
Qasigiannguani efterskoliliornissamut immikkut ittumik aningaasaliisoqarneranut atatillugu Kultureqarnermut ilinniartitaanermullu naalakkersuisoqarfik Inatsisartut Aningaasaqarnermut ataatsimiititaliaannut nipangiussisimanerarneqarpoq, naak aningaasaqarnermut Naalakkersuisoqarfiup tusarniaanermut akissumminni aningaasaliisoqarnissaa apeqquseraat allaat kinguartinneqarnissaa innersuussutigalugu.
Kultureqarnermut ilinniartitaanermullu naalakkersuisoqarfiup aqunneqarnera kukkunersiuisumit Deloittemit misissuiffigineqarpoq, Qasigiannguanilu efterskoliliornissamut atatillugu aningaasaliisoqannginnissaa pillugu paasissutissanik Kultureqarnermut ilinniartitaanermullu naalakkersuisoq Tommy Marø Demokraatit naapertorlugit nipangiusseqataasimammat naalakkersuisup tunuarniuteqarnissaa piumasaraat.
Tatiginninnginnermik takutitsiniarneq Inatsisartuni tallimanngorpat aatsaat pisussaavoq, sooq maanna taama nalunaaruteqarpisi?
- Partiit allat tamanna pillugu isummersorsinnaaniassamata maannakkut saqqummiupparput, Palle Christiansen oqarpoq, inatsisitigullu misissuisoqartariaqarnissaanik piumasaqaateqartoqartariaqannginnerarlugu:
- Kukkunersiuisut misissuinerat arlaannaanulluunniit attuumassuteqanngitsunit misissuineruvoq, taamaammallu inatsisitigut naliliisoqartariaqarani, Demokraatit politikkikkut oqaaseqartartuat Palle Christiansen oqarpoq.
Palle Christiansen Inatsisartut aningaasaqarnermut ataatsimiititaliaannut aamma ilaasortaavoq.