Tommy Marø: Ukiumut isertitakikkaluartut inuussutissaqarluartarput

Ilaqutariinnermut naalakkersuisoq Tommy Marø MIPI-p nalunaarusiaa pillugu ippassaq unnukkut Itisiliineq tv-kkut aallakaatinneqarmat ilaatigut oqarpoq,

nunaqarfinni ilaqutareeqartoq ukiumut immaqa isertitakikkaluarlutik, piniakkaminnik inuussutissaqarluartartunik, taakkulu misissuinermi ilanngunneqarsimanngitsut.

Misissueriaatsit assigiinngitsut qanorluunniit ittut atorlugit misissuigaluaraanni, suli meeraqarpoq kaallutik taquaqaratillu atuariartortartunik. Tamanna pillugu Tommy Marø oqarpoq, angajoqqaat pisussaaffitsik naammassisinnaangippassuk pisortat pisussaasut maannamut iliuuseqareersut.

Kommunit meeqqat atuarfiini atuartunut nerisitsisarnissamut taperneqarnissaminnik qinnuteqarsinnaapput, ukioq mannali sisamaannaat qinnuteqarsimapput. Tassa Nuuk, Narsaq, Sisimiut aamma Tasiilaq.

Kommuneqarmat aningaasarliortunik, taakkulu meerartaat eqqugaaqqunagit kommuneqarfiit tamarmik aappaagu 2008-mi atuartunik nerisaqartitsinissamut qinnuteqarsinnaanissaat Naalakkersuisut qulakkeerniaraat, Tommy Marø oqarpoq.