Tommy Marø: -Paasut isigiinnarsinnaannginnakkit politeeqarfiliarpunga

Naalakkersuisunut ilaasortaq Tommy Marø aalakoorluni decembarip pingajuani politiinit biiliutitikkumasimavoq.

Tommy Marø aperaarput qanoq ililluni politeeqarfiliartariaqalersimanersoq.

- Politeeqarfiliarsimavunga naalakkersuisutuunngitsoq innuttaasutulli isigiinnarsinnaanagu inoqatitta ilaat inuusuttoqatiminik saassunneqartoq isigiinnarsinnaannginnakku aammalu pisussaaffittut isigigakku politeeqarfimmut nalunaarutigiartornissaa. Iseramalu sumi saassussisoqarnera oqaatigaara, Tommy Marø oqaluttuarpoq, nangipporlu:

- Taassuma kinguninngua Nuussuarmut angerlarniarlunga taxanik pissarsisinnaanngeriarama aperaakka kullorsorfigisinnaannginnerlugit. Immikkullu biiliorneqarnissamik noqqaanngilluinnarpunga, oqarpoq.

Taanna nassuiaavoq isernermininngaanniit minutsit pingasut sisamat qaangiuttut paasigamiuk politiit ulapittut ingerlaannaq anisimalluni.

Tommy Marø aperaarput taakku paasut sumiinnersut.

- Eeeeeh imaattumi imerniartarfiup silataani eeeh paapput….angerlamut aallarlunga silataani eeh taamatut eeeeh pisut eeeh takugakkit soorunami akuersaarunamanagit inuillu isiginnaaginnarmata politiinut kalerriiartorsimavunga, Tommy Marø oqarpoq.

Qalleqqissaalluta aperaarput imerniartarfimmiit politeeqarfiup tungaanut ungasiartukasiummat mobiileqarsimassammallu sooq sianipallalaaginnarsimannginnersoq.

(Illarpoq) – mobiileqanngilanga, taamaammat arpallunga kalerriiartorsimavunga, akivoq.

Qalleqqissaaqqippugut mobileqarsimanngikkuni ajornannginnerpaajunnginnersoq allap mobiilia imaluunniit imerniartarfimmut iseriarluni telefonissarsiupallalaaginnarsinnaannginnersoq.

- Taama ajornanngitsigisutut uanga nalilerusunngilara piffissami tassanerpiaq. Aamma inuit isiginnaaginnartut soorunami qinngarnaraluartut akuersaaruminnatsissimavara, Tommy Marø oqarpoq.

Taanna aamma oqarpoq taama iliorsimanini aviisitigut allaaserineqaqqaarmat ingerlaannaq partiit tamaasa minnerunngitsumillu demokraatit kina pineqarnersoq ilisimatitsissutigisimagini.

Demokraatineersup Palle Christiansenip naalakkersuisunut apeqquteqaatigaa naalakkersuisuni ilaasortaq aalakoorluni politiinut saaffiginnissimasoq kinaanersoq, kingorna naalakkersuisut siulittaasuata Hans Enoksenip tamanna kinguneqartinneqassanngitsoq akissuteqaatigaa.