Tommy Marø-mut tatiginninnginneq
Inatsisartut upernaakkut ataatsimiinnerata ammarneqarnerani nalinginnaanngitsumik tatiginnikkunnaarnermik saqqummiussisoqarpoq. Tassa Demokraatit Kulturimut, Ilinniartitaanermut, Ilisimatusarnermut Ilagiinnullu naalakkersuisumut, Tommy Marø-mut, tatiginninnginnermik saqqummiussimmata.
Demokraatit saqqummiuppaat Tommy Marø julefrokosternermi kingorna tusaamanerlugaasumi sallulluni nassuiaasimasoq, tassa politiinut angerlaateqqulluni saaffiginninnermi kingorna.
Demokraatit Marøp Inatsisartuni partinut nassuiaataa innersuussutigaat, tassanimi allassimammat “angerlaanneqarnissara pillugu politiinut saaffiginninngilanga”. Taava Demokraatit naalakkersuisunut ilaasortat akisussaaffeqarnerat pillugu Inatsisartut inatsisaat innersuussutigaat, tassanimi allassimammat naalakkersuisunut ilaasortat eqqunngitsunik imaluunniit sallullutik paasissutissiissanngitsut.
Kisianni tatiginnikkunnaarluni saqqummiussineq taasissutigineqanngitsoorpoq, tassami naalakkersuisooqatigiit partiivi tassa Siumut, IA aamma Atassut oqaluuserisassamik pinngitsoortitsisussamik saqqummiussaqarmata. Matumani paasineqarmat politiinut saaffiginninneq pinerlunnerunngitsoq aamma inatsisinik unioqqutitsinerunngitsoq.