TV-kkut kanalinik siammarterisup GreenSat-ip unnulaaginnaaralu atoqatigiittunik pornonik kanalit ilaanni isiginnaagassaqartitsisarnera Kulturimut Naalakkersuisup, Tommy Marø-p ajuusaarutigaa, pisisartulli niuertullu akunnerminni isumaqatigiinnermikkut niueqatigiittarmata annertunerusumik oqaaseqarfigerusunngilaa.
- Kanali taanna isiginnaarneq ajorakku annerusumik oqaaseqarfigisinnaanngilara, pisisartut niuertullu akunnerminni nammineq isumaqatigiissusiortarnerat pissutigalugu. Naalakkersuisutut inuttullu ajuusaarutigaara meeqqat suli eqqumanerisa nalaanni kanalit ilaat taamatut aallakaatitsisarmat.
GreenSat-ip taama aallakaatitsisarnerata aaqqivigineqarnissaa nunatsinni Radio TV-lu pillugit aalajangiisartuisa decembarip aallaqqaataani GreenSat-imut saaffiginnissutigaat, tamannalu naalakkersuisut arajutsisimanngikkaat Tommy Marø oqarpoq.
- Kultureqarnermut naalakkersuisoqarfik radio tv-lu pillugit aalajangiisartut sinnerlugit GreenSat-ip piginnittuanut saaffiginnippoq, tassani unnulaaginnartoq atoqateqartunik aallakaatitsisoqartarnerata pinaveersaartinneqarnissaa GreenSat-ip qulakkeersinnaaneraa paasiniarparput nassuiaateqaqqullugulu.
