Ilanngaaserisut hashimik, tupanik imigassanillu angalasuni nassaartut

Akileraartarnermut Aqutsisoqarfimmi ilanngaaserisut Kangerlussuup Mittarfiani sapaatip akunnerani 37-mi immikkut misissuipput

Tikittut aallalersullu nassataat  nassiussallu  tamakkerlugit misissuiffigineqarput, immikkullu iliuuseqarnermi arsaarinnissutigineqartut Naalakkersuisut nittartagaani atuarneqarsinnaapput.

Ilanngaasersisut nassatanik misissuinerminni ikiaroornartumik hashimik eqqusseriartunik ulluni sisamani mississuinerminni  naammattoorsigamik hashi 194 gram arsaarinnissutigaat.

Aamma Sikaritsit kartonngit 16-it, Imigassat 7,7 literi , Viinni ataaseq, Sikaritsit puussai 1000-it
Immiaaqqallu 4 literi arsaarinnissutigineqarput,  Akilereraartarnermut Aqutsisoqarfik taama oqaluttuarpoq.

Akiliisitsissutigineqartut katillugit 19.222,-kr.-iupput.

Akilereraartarnermut Aqutsisoqarfik taamatut annertussuseqartumik siullerpaamik misissuivoq makkulu immikkut misissuiffigineqarput:

Nioqqutissat akitsuutillit, ikiaroornartut eqqunneqaqqusaanngitsut assigiinngitsut, Cites-ip ataani uumasut illersukkat timaasa ilaannik sanaat, Aatsitassat Eqqunneqaqqusaanngitsut allat kiisalu nioqqutissat immikkut akuerineqaqqaartussat

Immikkut ittumik misissuineq sapaatip akunnerani 37-mi ingerlanneqartoq ilikkagaqarfiuvoq, siunissamilu Kalaallit Nunaanni ilanngaaserisut misissuinerannut pilersaarusiornermi iluaqutaajumaarluni.
Akileraartarnermut Aqutsisoqarfimmit naatsorsuutigineqarpoq immikkut misissuinerit taamatut ittut pinaveersaartitsinermik sunniuteqarluarumaartut.