Tjernobylimi ajutoortoqarneranit ullumikkut ukiut 30-t qaangiussimalerput
Ajutoortoqarsimanera Sovjetimi aqutsisut taamani ullut arlallit qaangiummata aatsaat nassuerutigaat, inuillu tuusintilippassuit qimagussortinneqarput angerlarsimaffimminnullu kingorna uteqqinngillat.
Ullumikkullu, ukiut 30-t qaangiunnerini, atomimik nukissiorfissuup ajutoorutigineqartup Tjernobylip eqqaani uumasorpassuaqalersimavoq. Nukissiorfissuaq qimanneqarsimasoq amaqqunit, tuttorpannit hiistinillu maanna najorneqarpoq.
Aamma atomimik nukissiorfiusimasup eqqaani allarsuit ussippaarsuillu orpippassuarni narsanilu kvadratmeterinik 4200-suni eqqissillutik uumasuupput.
- Pinngortitaq inunnit najorneerukkaangat - aamma atomimik nukissiornikkut ajutoornerit ajornerpaartaata kingunerisaanik - taava uumasorpassuaqalersarpoq, Jim Smith, avatangiisit pillugit ilisimatusarnikkut immikkut ilisimasalik Tuluit Nunaanni University of Portsmouthimeersoq taama oqarpoq.
- Uumasut nujuartat Tjernobylip eqqaaniittut ajutoornerup siorna amerlassusaannut naleqqiutissagaanni maanna amerlanerungaatsiarnissaat ilimanartupilussuuvoq, Jim Smith oqarpoq.
- Ima paasineqassanngilaq qinngornerit ulorianartut uumasunut akornutaanngitsut. Inuilli piniartarnerat, nunalerisarnerat orpippassualerisarnerallu uumasunut akornutaanerujussuupput.
- Uumasut nujuartat inunnit akuliuffigineqanngikkaangata qanoq akiuussinnaassuseqartiginerannut takussutissaalluarpoq, USA-mi University of Georgiami ilisimatusartoq Jim Beasley taama oqarpoq.