Tjernobyl-imi tiguarneqarsimasumi ajutoortoqarnissaa Ukrainep aarleqqutigaa
Ukrainep sakkutuui isumaqarput Tjernobyl-imi atomip nukinganik nukissiorfimmi matuneqarnikumi sakku imassaasa qaartoornissaat ulorianartorsiortitsisoq aamma russit sakkutuui nukissiorfimmik tiguaasimasut tunuartariaqartut.
Ukrainemi ministeriunerup tullersortaa Irina Vereshtjuk oqarpoq marlunngormat Istanbulimi Tyrkiamiittumi Ukrainep Ruslandimik isumaqatigiinniarnermi Tjernobyl ilanngukkaa.
Tassani Ukrainemiut piumasaqaat taaqqippaat inunnik ikiuiniarluni aqqutissat illersukkat pilersinneqarnerannut atatillugu atomip nukinganik nukissiorfimmi matuneqarnikumi FN-ip sakkutuuinik nukissiorfikumi inissiinissaq aqqutissiuunneqassasoq. Sakkutuut isumagissavaat nunap ilaa taanna sakkutuuerutinneqassasoq.
AAMMA ATUARUK Putinip Zelenskyj-llu qanittukkut ataatsimeeqatigiinnissaat Erdoganip neriuutigaa
- Atomip nukingata sunniisinnaanera eqqarsaatigalugu russit sakkutuuisa akisussaassuseqanngitsumik sulialliu tungaasigut pikkorluttumik iliornerat ukrainemiunuinnaanngitsoq kisianni aamma europamiunut arlalinnik milliuuninut aarlerianrtorsiortitsisut, oqarpoq.
Nukissiorfiup russinit tiguarneqarsimanerani sulisut untritilikkaat nukissiorfik matoqqasoq sapaatip akunnerini arlalqaqisuni qimassinnaasimanngilaat, ulloq-unnuarlungajak taarserneqarnatik sulisarlutik.
Det Internationale Atomagentur-ip (Nunat Tamalaat Atomi pillugu Sullissiviup) sulinermi atugassarititaasut isornartorsiorpai isumannaallisaaneq ajoqusernerarlugu, sapaatilllu akunneri pingasungajaat qaangiummata sulisut sisamararterutaat sinnilaarlugit taarserneqarput.
Veresjtsjuk oqarpoq Tjernobyl-imi nukissiorfiup qeqqata aattoornikup puua ajoquserneqarpat pujoralaat mingutsitsinerlu annertoqisoq aniatinneqarsinnaasoq.
Tjernobyl atomip nukingani nukissiorfiuvoq matuneqarnikoq, 1980-ikkut qeqqanni qaartoortoq, taamalu qinngornernik radioaktiviusunik Europap ilarujussuanut siaruarterilluni.
