Tivolimi 33-ssaa naapisimaarniarput

Tivolimi aggustip aallaqqaataani naapittarnerit 33-issaat aallartippaat, erinarsornerit, nipilersornerit, qitinnerit, isiginnaartitsinerit kiisalu atisanik mutinik qajartortunillu takutitsinerit imaaginnavissallutik. Aammattaaq Aviisi Sermitsiaq siornatuulli videukkut inuulluaqqusisinnaatitsissaaq.

Ullut naggaserlugit arnat ullutsinni tusaamaneqarnerpaasut tusarnaarneqarsinnaassapput, tassaasut Nina Kreutzmann Jørgensen, Liima Inui Randi Broberg erinarsortoralugu kiisalu aaqqissuussaq naggaserlugu Julie Berthelsen tallimanngorpat tusarnaartitsissaaq. Neriniartarfiit nerisassanik nunatsinneersunik neqerooruteqarput kiisalu ukioqatigiit naapisimaarsinnaassapput.

Angalasut amerlassusaat unammilleqatigiinneq pissutigalugu Air Greenlandimiit isertuussaapput taamaattorli angallaffiunerpaami sapaatip akunneranut quleriarluni atlantiku qulaanneqartarmat siumuinnaq angalasut 2.000-it missarpiaaniissapput. SAS-ip aasaq manna timmisartuussineri sapaatip akunneranut pingasuummata siumuinnaq angalasut 400-it missaanniipput.

Tivolimut siorna ulluni pingasuni isertut 80.000-it sinneqarput.