Titartakkanik nangeqattaartuliaq japanimiunit tigulluarneqartoq

Nunarput Japanimi assigiinngitsutigut saqqummersinneqarmat, aamma eqqumiitsuliortunik ilaasoqarpoq. Titartaasartoq Nuka Konrad Godtfredsen titartakkaminik saqqummersitsivoq.

Eqqumiitsuliortup Nuka Godtfredsenip, titartakkani nutsigassiaq "Qanga", japanimiusut nutserneqarsimasoq saqqummersippaa, japanimiunillu nuannarineqarluartoq oqaatigaa.

Ukiut tusindtillit matuma siorna, nunarput allamiunik tikerarneqaqqaartalermat pisimasut titartaganngorlugit Nuka Godfredsenip saqqummersippai.


-Maannakkut suliakka nunatta oqaluttuassartaanut titartagartalersuinerupput, tassanilu pineqarpoq nunatsinnut apuuttut siulliit aammalu nunatsinnut apuuttut tullii taavalu uagut siulivut Inuit, tassa tassani "Qanga" projektimi pineqarpoq, nunatsinni ukiut tusindit ingerlaanerini ingerlaartut kikkuusimaneri tassani pineqarput, Nuka Godtfredsen oqarpoq.

 

Aamma atuaruk Karl-Kristian Kruse: Japanimi nittarsaassineq iluatsilluarpoq

 

Nunarput Japanimi assigiinngitsutigut marsip naanerani saqqummiunneqarpoq, aalisakkanik qalerualinnillu tunisassiortut Japanimi qangali tuniniaalluareertut niueqatitik aalluppaat, takornariartitsinermik suliallit nutaanik takornariartussarsiorput, taamatullu kulturerput saqqummiunneqarpoq. 

Titartakkamik nangeqattaartuliamik "Andala"-mik pilersitsisoq, Nuka Godtfredsen, 1997-miilli titartakkaminik saqqummersitsisalerpoq. 

Japanimiut titartakkanik soqutigisalippassuupput, Nuka Godtfredsenillu saqqummersitaanut tunngasunik itinerusumik apeqquteqartarlutik paasiniaasut, titartaasartoq oqaluttuarpoq.


-Japanimiusut saqqummiunneqarnera uangaalluni tulluusimaarnartorujussuuvoq, Nuka K. Godtfredsen KNR-mut oqarpoq.

 

Minutsit pingasut titartaavoq

Taamatullu Nuka Godtfredsenip, saqqummersitsinermini minutsit pingasut atorlugit toqqaannartumik filmiliarineqarluni titartaavoq, 


-Tassani titartarpara, arnap inuusaarakassak qiperlugu suliarigaa, tassani minutsini pingasuni titartaallunga takutippara, Nuka Godfredsen oqarpoq. 

 

Tassanilu Japanimi kejserikkut, Danmarkimilu kunngissakkut naalakkersuisullu peqataasunut ilaasimasut eqqumiitsuliortup oqaatigaa.

Nuka Godtfredsenip "Qanga" saqqummersitaa, Canadami, Islandimi aamma Alaskameeriarluni maannakkut Tokyomiippoq, tassanilu sapaatit akunneri pingasut nivingassaaq. Taassumalu kingorna aasamut Frankrigip kujataanut ingerlaqqissasoq oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat