Inatsisartuni amerlanerussuteqartut: Danmarkip ikiuukkusunnera akuersaarneqarli
Inatsisartuni partiit amerlanerussuteqartut danskit nunatsinni isumaginninnikkut ikiorsiinissaannut akuersaarput, taamaalillutik partiit akuersaartut amerlanerussuteqalerlutik. Isumaqataasut sinneri tassaapput: Suleqatigiissitsisut, Atassut Demokraatillu.
Folketingip isumaginninnermik susassaqarfimmut atatillugu ikiuinissamik neqeroorsimanera Naalakkersuisut itigartitsissutigisaat, Inuit Ataqatigiinniit uggornartutut nalilerneqarpoq.
- Neqeroorulli suli atuuttoq, danskit partiivisa qassiiusut erseqqissaatigimmassuk Inuit Ataqatigiinniit qujarullugu Naalakkersuisunut tigoqqujumavarput, ikiuukkusunnerlu akueriniartigu, Mimi Karlsen taama allaaserisaqarpoq.
Naalakkersuisut itigartitsisut
Naalakkersuisut angallanermut tunngasunik suliaqarnerminni danskit naalakkersuisuinit ikiorneqarnissartik qujaruppaat, taamaammat Inuit Ataqatigiinnit eqqumiigineqarpoq danskit neqeroornerat Naalakkersuisut sooq itigartitsissutigineraat.
Inunnik isumaginninnermik akisussaaffik tamakkiisumik nammineq akisussaffigaarput, nalunngilarpulli nassuerutigalugulu inunnik isumaginninnermi ikiugassat, sullitassat amerlangaarmata kisimiilluta angummassinnaanata, nunatsinnilu inuit ikiorasuagassagut amerlapput, taakkulu ukiunik arlalinnik utaqqisiinnarsinnaanngilagut, taamaammat Inuit Ataqatigiit isumaqarpugut danskit ikiuukkumanerat qujarutissagipput, Mimi Karlsen allaaserisaqarpoq.
Partiit, IA, Suleqatigiisitsisut, Atassut Demokraatillu Danmarkip ikiorsiinissaanut akuersaarmata, Inatsisartuni ilaasortani 31-usuni 17-it akuersaarmata amerlanerussuteqarlerput.
