Tine Bryld: Politikerit unikaallattariaqarput
Danskeq atuakkiortoq inunnillu siunnersuisartoq Tine Bryld kalaallit politikeriinut oqariartuuteqarpoq.
- Kalaallit politikerii sassartariaqarput, ineriartornerup inuppassuit inuunerannik akeqarsimanera oqariartuutigalugu, taama isumaqarpoq Tine Bryld.
Politikerit unikaallattariaqarput Kalaallit Nunaatalu oqaluttuassartaa nutaajuneq inuppassuarnik annaasaqarfiusimasoq kingumut qivialaarlugu.
- Politikerit sassartariaqarput oqarlutillu ilisimallugu oqaluttuarisaanerput nutaajuneq inuit imernerujussuannut peqqutaaqataavoq, Tine Bryld radioavisimut oqarpoq.
Inuit anniaatitik aliasuutitillu arlaatigut annittariaqarpaat, pisimasullu taamaalillugit akueralugit, aatsaammi taamaaliorluni inuunermik ingerlariaqqittoqarsinnaalissaaq, Tine Bryld oqarpoq.
Taassuma Illu Atlantikumiittut assilissat Louise Fontainimit ulluni makkunani saqqummersinneqartut isiginnaarsimavai.
