Timmissat oqaluuserineqassapput

Inatsisartunut ilaasortap Siumumeersoq Jens Lars Fleischer, Atassummiillu inatsisartunut ilaasortat tallimat, tamarmik assigiinginnangajattunik allannguutissatut siunnersuuteqarput.

Allannguutissatut siunnersuuteqartut isumaqarput, nalunaarut sukangavallaartoq.

- Nalunaarut timmissat illersorneqarneranut tunngasoq Avannaamiunut attuisupilussuuvoq, aallaat inooriaasiannik allannguisuulluni, Jens Lars Fleischer Siumumeersoq oqarpoq.

Ilaasortat Atassummeersut assigalugit taanna allannguinissamik siunnersuuteqarpoq.

Tassa isumaqartoqarpoq nalunaarut sumi najugaqarneq aallaavigalugu ilusilersorneqartariaqartoq.

Atassutikkormiut isumaqarput, inuutissarsiutigalugu piniarnermik allagartaqartut inuiaqatigiinnik timmissanik pilersuisinnaanngorlugit pisinnaatitaaffilerneqartariaqartut.

Siunnersuut timmissat pillugit peqatigiiffimmit ”Timmiaq”-mit qisuariarfigineqarpoq.

Peqatigiiffimmiit naalakkersuisunut ilaasortamut Ark’alo Abelsenimut ammasunik allakkiortoqarpoq apeqquteqartoqarlunilu.

Peqatigiiffimmit Timmiamit isumaqarput timmissanik piniarsinnaatitaanermik pisinnaatitaaffiliisoqaraluarpat, piniartut ikiorneqarnavianngitsut.

Akerlianilli timmissat kisinneqarnissaannut nakkutilliivigineqarnissaannullu Naalakkersuisut aningaasanik immikkoortitsisariaqarsoraat.