Ikiligaluttuinnarnerisa iliuuseqarfiginerisigut, timmissat imarmiut amerliartoqqilernissaat neriuutigineqartoq Jens Bagger, Aalisarnermut, Piniarnermut Nunalerinermullu Naalakkersuisoqarfimmeersoq oqarpoq.
Taamatut nalunaaruteqartoqarpoq, Sverigemi illoqarfimmi Malmømi timmissanut tunngasunik ilisimasanik paarlaasseqatigiittoqarnerani, inuit 30-nit amerlanerusut avatangiisinik, piniarnermik, aalisarnermik, nukissiuuteqarnermik ilisimatusarnermillu suliallit peqataaffigisaanni.
Jens Baggerip oqaatigaa taamatut suliniuteqarnermi pilersaarummi pingaartinneqartoq timmissat imarmiut amerlanerugunik pinngortitami pisartut pitsaanngitsut kingunerisartagaat killilersimaarneqarsinnaasut.
- Timmissat imarmiut amerlanerugunik ilaatigut aalisarnermit, umiarsuarmik angalanermit uuliasiornermit gassisiornermillu ajoqusiinerit kinguneri pinngitsoortissinnaavaat, Jens Bagger oqarpoq.
Nunani avannarlerni timmissanik imarmiunik illersuiniarluni pilersaarut ukiap ilaani saqqummiunneqassasoq ilimagineqarpoq.