Timmisartuutileqatigiiffinnut ikiorsiigasuarnissaq EU-mi oqallisigineqarpoq
Islandimi qaqqap innermik anitsisup qullaatsitaasa kinguneranik, timmisartut tuusintilikkaat aallarsinnaannginnerat pissutigalugu timmisartortitseqatigiiffiit millionit koruunerpassuarnik annaasaqartut, EU-mit piaartumik ikiorserniarneqalerput.
Allattoq Elisa Isaksen
apriilip 19-at 2010 14:10
Naalagaaffiit EU-mut ilaasortat angallannermut ministerii ullumikkut ataatsimeeqatigiipput - tassa naapeqatigiinngikkaluarlutik videukkut ataatsimeeqatigiikkamik - timmisartortitseqatigiiffiit qanoq ikiorserneqarsinnaanerat ataatsimiinnermi oqaluuserineqarpoq. EU-mi angallannermut kommissæri Sean Callas oqarpoq timmisartortitseqatigiit ikiorserneqarnissaat piaartumik akuersissutigineqassasoq, taamaattorli ikiorsiinissami EU-mit ataatsimoortumik ikiorsiisoqarani naalagaaffiit ataasiakkaat ikiorsiissasut.
Kisianni nunat EU-mut ilaasortat isumaqatigiinngillat. Frankrigip angallannermut ministeriata ikiorsiisoqarnissaa isumaqatigaa, Tysklandilli angallannermut ministeriata ikiorsiisoqarnissaa akerlerilluinnarlugu.
