Timmisartuussiunnaarneq sivitsorneqarpoq

Timmisartunik suluusalinnik aamma qulimiguulinnik angallassinissat 65-it taamaatinneqarput, tamatumalu kingunerissavaa timmisartumik angalasussat 1200-t timmisartuunneqarsinnaanngerannik.

Timmisartuni sulisut suliartornissaannut mattunneqarnerisigut timmisartuni angalaniartut sapaatip akunnerata ingerlanerani ullormut 1000-inik amerlanerusut eqqorneqartassapput.

Timmisartortitseqatigiiffiup Air Greenlandip timmisartortartuisa timmisartunilu sulisut akornanni isumaqatigiinnginnerat pissutigalugu, timmisartuni ilaasussat 7000-it eqqorneqassapput, tassalu Kalaallit Nunaani innuttaasut arfineq-marlugaangata ataaseq timmisartumut ilaaniartoq eqqorneqartassaaq.

- Illuatungeriit isumaqatigiinniarlutik naapinnissaminnut isumaqatigiissuteqarsimanngillat, Air Greenland sinnerlugu isumaqatiginniarnermi sinniisuutitaaq Mads B. Christensen oqarpoq.

Illuatungeriit maannakkut eqqarsarput, Mads B. Christensenillu erseqqissarpaa Air Greenland isumaqatiginniarnissamut qaquguluunnit sumiluunnit piareersimasoq.

- Nutaamik isumaqatigiissuteqarnissamut annertuumik nikeriarnikuuvugut, maannakkullu illutungerisat uagutsinnut qanilleriarnissaat utaqqivarput, Mads B. Christensen oqarpoq.

Timmisartortartut aquttuisa isumaqatigiinniarnermi aquttuat Toni Rykønen KNR-imut oqaaseqartinneqarsinnaasimanngilaq.

Timmisartuni aquttut saqisullu suliartornissaannut mattunneqarnerisigut, allakkat Kalaallit Nunaannullu nassiussat eqqorneqarput.

Air Greenlandip Danmarkimi Kalaallit Nunaannilu nassiussanik tunniussissarfii matoqqapput.

Angalasussaagaluit kiffartuunniarlugit, Air Greenland oqarasuaammik saaffigineqarsinnaasumik ammaavoq, taannalu normoqarpoq 34 33 35 taannalu sapaatip akunnera naallugu ullaakkut arfineq pingasuniit unnukkut arfineq pingasut tungaanut sianerfigineqarsinnaavoq.