Timmisartuussinermi unammillerneq tamakkiisoq

Nunatsinniit nunatsinnullu timmisartuussisarnerit tamakkiisumik unammillerfiusinnaanngorlugit aaqqiisoqarnissaa takornariaqarnermut siunnersuisoqatigiinniit naalakkersuisunut kaammattuutigineqarpoq.

Angallannermut naalakkersuisoq oqarpoq, takornariat amerlanerulernissaat angorusukkamikku siunnersuisoqatigiinnit kaammattuutigineqartoq misissorniaritsik.

- Takornariaqarnermut inuussutissarsiornermullu siunnersuisoqatigiinniit tuluttut "open Skies"-imik taaneqartartup atuutsinneqalernissaanut, tassa nunat akornanni timmisartuussisinnaanerit ammaanneqarluinnarnissaannik kaammattuuteqarnitsinnut aallaaviuvoq, timmisartuussinerit unammillerfiulernissaat angorusukkatsigu. Takornariaqarnermut Inuussutissarsiornermullu Siunnersuisoqatigiinni pisortaq, Stig Rømer Winther oqarpoq, nangillunilu:

- Nunani allani pissutsit qiviaraanni takuneqarsinnaavoq unammillersinnaanermut aporfiusinnaasut atorunnaarsinneqaraangata timmisartuussisarnerit akikillitikkiartuaartinneqalersartut, tamannalu takornariaqarnermut siunissami iluaqutaalersinnaassasoq qularinnginnatsigu taamaaliortoqarnissaanik kajumissaaruteqarpugut, Stig Rømer Winther naggasiivoq.

Angallannermut nalakkersuisoq, Jørgen Wæver Johansen oqarpoq, nunatta iluani timmisartuussisarnermi unammillernissamut periarfissat tamakkiisumik atuutereersut, tamatumali saniatigut aamma nunanit allaniit nunatsinnut timmisartuussisarnerit naalakkersuisuniit ukiuni kingullerni eqaatsorujussuarmik pissuseqarfigineqartarsimasut.

Jørgen Wæver Johansen-illi erseqqissaatigaa takornariat nunatsinni amerlanerulernissaat soqutigisarigamikku takornariaqarnermut inuussutissarsiornermullu siunnersuisoqatigiinniit kaammattuutigineqartoq misissorluarumaaritsik.