Timmisartuussinermi malittarisassat oqilisinneqarput

Imerpalasumik annerpaamik 100 milliliterimik nassatani tigummiartarissani nassartoqarsinnaaneranik malittarisassap, ilaatigut nakorsaatinut meeraaqqallu nerisassaannut tunngatillugu, ilaannakortumik atorunnaarsinnissaanik EU-kommissioni aalajangeeqqammerpoq, taamaaliornikkullu timmisartumut allamut ilaaniarluni mikkallarnermi, assersuutigalugu imigassanik, aamma pisisoqarsinnaalissaaq.

Karupip mittarfiani pisortap, Erik Rasmussenip, aalajangersakkanik oqilisaasoqarnera nuannaarutigaa. Danmarkimi, Kalaallit Nunaanni Savalimmiunilu nunap immikkoortuini mittarfeqarfinnut siulittaasutut malittarisassat ikilisinneqarnissaannik taanna sulissuteqarsimavoq:

- EU-p peqqussuteqartarneratigut piumasaqaaterpassuit pilersartut unikaallakkiartortut isikkoqarput, DR Midt & Vestimut oqarpoq.

Malittarisassat nutaat aappagu januaarip ulluisa 31-ianni atuutilissapput.