Timmisartuussinerit ukiuni arfineq-pingasuni aatsaat taama ikitsigisut
Nunatsinni silaannakkut ilaasunik angallassinerit 2013-imi katillugit 397.856-iupput. Naatsorsukkani taakkunani heliportinit aamma nunaqarfinnit qulimiguullit mittarfiinit mittarfeqarfinnillu tamanit aallarnerit nalunaarsugaapput.
- Silaannakkut angallassinerit 2006-ip kingornagut aatsaat taama ikitsigipput. Taamaattorli siuariarnernik ataasiakkaanik naammattuugassaqarpoq, soorlu Islandimit Kulusummut timmisartuussisarneq takornarianit atorluarneqaleriartorpoq, Kalaallit Nunaannili namminermi silaannakkut angallassinerit ikileriarujussuarlutik, Mittarfeqarfinni attaveqaqatigiinnermi pisortaq Hans Henrik Lichtenberg nassuiaavoq.
Mittarfeqarfinni Kangerlussuaq kisiartaalluni allannguuteqarfiunnginnersaavoq, taannami nunanut allanut angallannermi qitiusutut inissisimagami.
Nunami namminermi angallannerit 2000-imit ukiuni arfineq pingasuni amerliartorusaarsimagaluarput, maannali killormut saassimasut, Mittarfeqarfiit tusagassiuutinut nalunaarumminni allapput.
