AWG2016 Timmisartuussineq arfininngorpamut kinguartinneqarpoq
Unammiuaariat Kangerlussuarmiit Nuummut tikipallanniassammata, AWG-milu ammaanersiorneq sapaammi unnukkut arfineq-pingasunut angumerineqarniassammat, Air Greenland timmisartuussinissamut nutaamik pilersaarusiorpoq.
Pilersaarutaasimagaluarpormi, North Albertaminngaanniit North West Territoryminngaanniillu unammiuaariat ullumikkut Nuummut tikinnissaat. Taakkuli tikinnissaat 24 tiiminik maanna kinguartinneqarpoq.
Aamma atuaruk Arctic Winter Games angerlarsimaffinnit ima malinnaaffigisinnaavat
- Suliffimmi ima ittumi sila naalagaasorujussuusarpoq. Pilersaarutaanngitsumik pisoqariataartussaatillugu pilersaarusiortarpugut, taannalu iluatsinngitsuussagaluarpat saniatigut allamik aamma pilersaarusiukkamik piareersimatitaqartarluta. Kisianni aap, nalorninartoqartuaannarpoq, AWG 2016-imi pisortaq Maliina Abelsen oqarpoq, nangillunilu;
- Tamatumunnga Air Greenlandi pitsammik pilersaarusioqatigaarput, taakkualu sullareqigamik timmisartuussinissamik pilersaarusiukkamik unnuarli sanaatipallareersimavaatigut, AWG 2016-imi pisortaq Maliina Abelsen oqarpoq.
Unammiuaariat arfininngorpat ullukkut marlunut tikeralernissaat naatsorsuutaavoq, AWG-2016-imullu ammaanersioreq unnukkut arfineq pingasunut aallartissasoq pilersaarutigineqarallarluni.
Aamma atuaruk AWG2016-ip pilersaarutai sila pissutigalugu kinguartinneqartut
Kinguuaattoornerup kinguneraa timersuutit arlallit piffissamut allamut nuunneqartariaqalernerat.
- Sulorarneq volleyballilu aqaguanut kinguartittariaqarsimavagut, Inussivimmi piareersaaqqaartussaagatta. Ataasinngornerup unnuaani (natten til mandag) piareersaapallareersimassaagut, taanna isumalluarfigaara. Neriulluarniarta unammiat sapaatiuppat tikereersimassasut, Maliina Abelsen oqarpoq.
