Timmisartut qaartinnissaat peqqarniisaarniat pilersaarutigisimavaat

Timmisartut arlallit Londonip USA-llu akornanni Atlantiku qulaallugu ulluni tulliuttuni timmisartuussilerpata qaartinniarlugit peqqarniisaarniat pilersaaruteqarsimasut, tuluk sillimaniarnermik suliaqartoq nalunaarpoq.

- Paaseriikkatta saniatigut tuluit politiivi paasissutisseerusunngillat, taamaammallu qanoq pisoqarnersoq, suliarluunniit sumut killinnersoq, oqaatigiuminaappoq, DR-ip tusassiortua Peter Krause Londonimiit oqaluttuarpoq.

- Tuluit politiivi, naalakkersuinermik suliallit, naalakkersuisullu mianersortorujussuupput. Suna tamaat qulakkeeqqaarlugu aatsaat oqaaseqarusuttarput. USA-mit tusatsiakkat naapertorlugit, peqqarniisaarniat nunani tamalaani suleqateqarsinnaanerat pasitsaanneqarpoq. Tuluit inuiaqatigiinnik aalajangersimasunik siornatigut pisuutitsisimanertik nuanninngitsumk misittagaqarfigamikku paasissutisseerusunngillat, Peter Krause oqarpoq.

Peqqarniisaarniat al-Qaedakkut qaartartumeerisarnerattut pilersaarusiorsimanerat tunngavigalugu, amerikamiut sutigut tamatigut sillimaniartut, DR-ip USA-mi tusagassiortuata oqaluttuaraa.

Timmisartorniartut ulloq naallugu timmisartoqarfinni utaqqipput. USA-mi sillimaniartoqartorujussuuvoq, timmisartunullu ilaasussat nassarsinnaasaat killilersorneqarput. Inuup eqqiarnermini atortagai nassarneqarsinnaajunnaarput. Nakorsaatit inuunermi pinngitsoorneqarsinnaanngitsut akimut ersittumik puullit kisimik nassarneqarsinnaapput. Ilaasussat timmisartumut ikiartunnginneranni misissorneqaqqaartarput. Timmisartut Tuluit Nunaanneersut Amerikamukarsinnaajunnaarallarput.

Amerikami naalakkersuisut mianersortorujussuullutik Tuluit Nunaanni pisunik paasissutissiipput. Paasinarsivorlu sivisungaatsiartumik attaveqatigiilluinnarlutik suleqatigiissimasut. Tuluit Nunaanni tigusat arlaqaraluaqisut qaartartumeeriniarsarisut tamarmik tigusaasimanissaat qularnarpoq. Tamanna tunngavigalugu USA-mi sakkortuumik sillimaniartoqartoq, Steffen Gram USA-mit naggasiivoq.