Timmisartut Boeing 737 MAX 8-t Norwegianip tuluillu atorunnaarallaraat

Boeing 737 MAX 8-t marluk ukiup affaata iluani nakkarnerisa kingorna, timmisartortitseqatigiiffiup Norwegianip timmisartut taama ittut atorunnaarallarpai.

Europami silaannakkut angallannermut oqartussaqarfiup, Easap, inassutaa najoqqutaralugu taama aalajangerluni Norwegianip paasissutissiissutigaa.

Danmarkimi Angallannermut aqutsisoqarfik timmisartut atorunnaarallarnissaannik atulersitsinngilaq. Aqutsisoqarfiulli ilisimatitsissutigaa pisut qanimut malittarineqartut Easalu ingerlaavartumik oqaloqatigineqartoq.

Tusarfiit atiisigut taaneqanngitsut inuussutissarsiorneq pillugu nittartakkatigut nutaarsiassaqartitsivimmut Bloomberg Newsimut oqaatigaat Easa timmisartup pineqartup atoqqusaajunnaarallarnissaanik pilersaartoq.

- Silaannakkut angallannermut oqartussat arlallit inassuteqarnerisigut Boeing 737 MAX 8-t atorunnaarallarniarlugit Norwegian aalajangerpoq, timmisartuutinut pisortaq Tomas Hesthammer tusagassiorfinnut nalunaarummi taama oqarpoq.

- Silaannakkut angallannermut oqartussat siunnersuuteqaraangata inassutigisaat soorunami malittarpagut. Angalasussanut matuminnga eqqugaasunut ajuusaarpugut, ilaasulli inuttallu isumannaatsuunissaat salliutittuartussaavarput, timmisartuutinut pisortaq oqarpoq.

Boeing 737 MAX 8-t Norwegianip pigisai 18-iupput. Taakkulu angallavigisartagaanni timmisartut allat atorneqassapput, ilaasut sapinngisamik ikinnerpaat eqqugaanissaat angujumallugu.

Tuluit Nunaanni, Tysklandimi, Kinami, Indonesiami, Singaporemi Australiamilu oqartussat timmisartortitseqatigiiffinnut tamanut Boeing 737 MAX 8-t atorneqarunnaarallarnissaannik naalakkiuteqarput.

Timmisartoq pineqartoq USA-mi suli misissuiffigineqarpoq atoqqusaajunnaarallarnissaanillu suli atuutilersitsisoqarani. Boeingimilli nalunaarutigineqarpoq Boeing 737 MAX 8-ni isumannaallisaaneq ingerlatseqatigiiffiup tamakkiisumik tatigigaa.

- Ingerlatseqatigiiffiit oqartussallu nunaminni niuerfinnut attuumassuteqartunik aalajangiisimanerannut paasinnippugut, Boeing taama allappoq.

Norwegianip saniatigut nunarsuarmi timmisartortitseqatigiiffiit allat aamma taama aalajangerput. Europami ilaatigut tassaallutik TUI aamma Icelandair, USA-milu American Airlines.

Timmisartoq sapaatiummat nakkarmat inuit 157-it ajunaarput. Boeing 737 MAX 8 alla Indonesiami oktobarimi aamma nakkarpoq. Inuit 189-t taamani ajunaarput.

/ritzau/Reuters