Timmisartup nakkarnera suli nassuiaatissaqartinneqanngilaq
Timmisartoq Rio De Janiaromiit qangattarami kallersumut pivoq, timmisartullu nammineerluni nassiussisartumit nalunaarutigineqarpoq, timmisartup innaallagissatigut atortorissaarutaasa ilaat ajoquteqartoq, taassumallu kingorna timmisartoq tusarfigeqqinneqanngilaq.
Timmisartumi ilaasut annassimanissaanik neriuut annikilliartorpoq. Maannali neriuutigineqarpoq boksi qernertoq paasissutissanik imalik nassaarineqarnissaa.
Timmisartup immap itinerujussuanut nakkarsimanissaa kiisalu immap sarfaa sakkortummat, boksi nassaariniarnissaa ajornakusoortorujussuusinnaavoq. Taamaattumik timmisartup aseqqukui sumut tamanut siaruarsimanissaat ilimagineqarsinnaavoq.
Timmisartup nakkarneranut suna pissutaasimanersoq suli qulakkeerneqanngilaq, timmisartulli nakkarneranut suut pissutaasinnaanerat eqqoriaanerit amerlaqaat, naluneqanngitsorli tassaavoq timmisartup tammannginnermini nammineerluni nassiussisartumit tigooraasumut nassiussinerit aqqaneq marluk ataanartumik nassiunneqarsimasut. Taakku assigiinngitsunik innaallagissatigut atortorissaarutimigut ajoquteqarnernermik nalunaarutaapput.
Eqqoriarneqartuni ilimanarnerpaasoq tassaavoq innaallagissatigut atortorissaarutit arlaqatut ajoquteqarsimanerat. Maannalu paaserusunneqarpoq suut ajoqutaasimanersut, taamaasillugu ajutoorneq taama ittoq siunissami pinngitsoortinneqassammat.
Taama ajortoorneq sunik pissuteqarpiavinnersoq paasiniarnissaa ajornarpoq. Ajutoornermut nassuaatigineqarsinnaasoq qaninnerpaaq tassaavoq kallerup innerata anorersuulluuniit ajutoorneq aallartissimasinnaagaa.
Timmisartup nutaakannersup isumannaatsuusorlu imaasiallaanarluni nakkarnera sumik pissuteqarnersoq ilisimaneqanngilaq, paasineqarnissaalu kissaatigineqartorujussuuvoq. Tamannalu iluatsinngippat ilimagineqassaaq timmisartup ajutoortup maskiinaata assingi, ullumikkut atorneqartut 600-it misaaniittut aallaavigalugit, misileraanerit assigiinngitsut ingerlanneqassasut, ajutoorneq taama ittoq siunissami pinngitsoortinniarlugu.
Timmisartumi boksit marluk paasissutissanik imallit ujaarineqarput. Siulleq innaallagissatigut atortorissaarutinik allanngortoqarneranik nalunaarsuisartoq. Boksip aappaa timmisartumi aquttut iluminni oqaloqatigiinnerat kiisalu timmisartut ingerlaarnerannik nakkutilliisut oqaloqatigiinnerannik immiussissutaavoq. Boksit qernertut ullut 30-it angullugit tigooraavinnut nassiussisinnaapput. Boksit Imarmut pigaangamik itisusersiorlugit paasissutissat anguneqarsinnaasarput.
