Savalimmiormiut timmisartortitseqatigiiffiata Atlantic Airwaysip kingumut teknikkikkut ajornartorsiuteqarnerata kinguneranik timmisartoq ilaasulik sakkortuumik mittariaqarsimavoq.
Timmisartoq Københavnimiit Savalimmiunukartoq Norgimi Bergenimut ataasinngormat nunnittariaqarsimavoq, timmiaq timmisartorsuup motooriisa ilaannit millugunneqarmat. Ippassaq unnukkut ajutoortoqaqqippoq, tassa Atlantic Airwaysip timmisartuutaasa ilaata Vágarimut minnermini assakaasuni marluk qaartoormagit.
Assakaasunik ippassaq unnukkut qaartoortoqarneratigut sakkortuumillu mittoqareerneratigut ilaasut mittarfimmiit tikittarfimmut bussinik assartortariaqarsimapput, tassa timmisartorsuaq nikissinnaajunnaarsimammat. Qanoq ililluni qaartoortoqarsimanersoq Atlantic Airwaysimit maanna misissorneqaruttulerpoq, ilimagineqarporli sukkaallisaatit ABS-it ajoquteqarsimassasut.
Atlantic Airways teknikkikkut ajornartorsiutinik ukiup affaata kingulliup ingerlanerani nalaattaqallattaarpoq, timmisartoq ataaseq aamma ajunaarpoq inuit sisamat inuunerannik akeqartumik.
Atlantic Airways pisortanit pigineqarpoq, kisianni Savalimmiuni Inatsisartut aalajangersimapput, timmisartortitseqatigiiffik namminersortunngorsarneqassasoq. Timmisartukkut angallassineq ingerlanneqartarpoq ilaatigut Savalimmiunit Danmarkimut, Islandimut, Norgimut, Skotlandimut aamma Tuluit Nunaannut.
