Sooruna Nuummuinnaq? Timmisartumut bilitsit nunatsinnut tamarmut atuuttariaqartut ilinniartoq isumaqarpoq
Kalaallit Danmarkimi ilinniartut Københavnimit Nuummut utimullu 1000 koruuniiginnarlutik angalasinnaalerput.
Ilinniartummi nunatsinnut atassuteqarluarnerulersikkumallugit, Danmarkip 2025-mi aningaasanut inatsisissaani 6 millionit koruunit immikkoortinneqarput.
Tamannalu amigaataasimasoq, kalaallit Danmarkimi ilinniartut peqatigiiffianni Avalammi siulittaasoq, Najana Kristensen oqarpoq.
- Angalaneq ilinniartunut akikinnerulertussaanera Avalaap tapersersornikuuaa. Ilinniartut ukiumut ataasiaannaq angerlarnissaminnut akiliunneqartarput, taamaammat akikinnerusumik billetsimik periarfissinneqarneq ilinniartunut nunatsinnullu iluaqutissatut isigaarput.
Peqatigiiffilli naapertorlugu ilinniartut naligiimmik iluaqutissarsinngillat.
Bilitsimmi Københavnimit Nuummut utimullu kisimik atuupput. Tamannalu Nuummi mittarfissuartaap qitiutinneqarnera pissutaavoq. Isumaqatigiissullu nutaaq ilinniartunut nuummeersuneernerusunut iluaqutaalertoq, Avalak isumaqarpoq.
- Nuup avataaneersuugaanni bilitsip akia sinneruttoq ilinniartup nammineq akilertussaavaa. Ilaannikkullu Nuummukaqqaarneq ilinniartumut akisunerulertitsisussaalluni. Taamaalluni Nuup avataaneersuugaanni bilitsi akikitsoq iluaqutaasussaanngilaq, Najana Kristensen oqarpoq.
Ikiuineq
Isornartorsiutillu aatsaat qaqinneqarnera IA-meersup Aaja Chemnitzip uggoraa. Avalammi qanimut suleqatigalugu aaqqissuussineq ineriartortinneqarsimasoq, taanna oqarpoq.
- Aaqqissuussineq ilinniartuutitsinnut ikiuunneruvoq. Naak nunatta iluani angallanneq ilaanngikkaluartoq, angalanerup ilaannut oqilisaassineruvoq, Aaja Chemnitz KNR-imut allakkatigut akissummini taama allappoq.
Ilinniartut Danmarkimiittut ilinniartuunerminni nunatsinnut attaveqarluarnerunissaat pingaaruteqarmat, aaqqissuussaq pilersinneqartoq, politikerip IA-meersup ilanngullugu eqqaavaa.
- Ilinniartut ilinniarnertik naammassigaagamikku ullumikkut 56 procentiinnai nunatsinnut angerlartarput. Taamaattumik politikkikkut iliuuseqartariaqartoq isumaqarpunga. Bilitsi akeqanngitsuunngilaq, ilinniartut taanna atussanerlugu nammineq aalajangissavaat, ilinniartualunnik tassunga nuannaarutiginnittunik peqarpoq, Aaja Chemnitz allappoq.
Kalaallit Danmarkimi ilinniartut ilinniakkaminnik naammassinnittut affaat nunatsinnut angerlaqqittarput. Nunatta Naatsorsueqqissaartarfiata tamanna ersersippaa.
Ilinniartut nunatsinnut atassuteqarnerunissartik namminneq aamma kissaatigigaat, Najana Kristensen oqarpoq.
Naalli bilitsit Nuummuinnaq aaqqissuussaangaluartut, amerlasuunit atorluarneqarnissaa naatsorsuutigaa.
- Tamanna ilinniartut ilinniarnerminni ilinniarnerullu kingorna nunatsinnut atassuteqarnerannut annertunerulersitsissasoq isumaqarpugut. Tamannalu ilinniarnerup nalaani kiserliornermut annikinnerulersitsillunilu toqqissisimanerulersitsissasoq isumaqarpugut. Eqqarsaatigaarput tamanna nunatsinnut siunissami tamakkiisumik iluaqutaassasoq.
- Danmarkimi ilinniartut Kalaallit Nunaata sineriaata tamaninngaanneersuummata, Avalaap kissaatigaa ilinniartunut naligiimmik neqeroorut atuutissasoq, Najana Kristensen oqarpoq.
