Timmisartumik toqqaannartumik Aalborgimukarsinnaalerputit
Nuummiut, Jyllandip avannaamiut soqutiginnittullu allat Nuup Aalborgillu akornanni – toqqaannartumik angalasinnaalerput.
Air Greenland danskillu angalatitsiviat Ruby Rejser suleqatigiillutik illoqarfiit taakku marluk akornanni aqqut nutaaq ullumimit septembarip aallaqqaataata tungaanut ammarpaat.
Timmisartup Airsevenip siullermeerluni tikinnera Nuup mittarfiani ullaaq nalunaaqutaq 08.27 iffiukkanik kaffimillu sassaalliuteqarnikkut malunnartinneqarpoq, Kalaallit Airports facebookimi quppernermini allappoq.
Timmisartoq tikinnerminit akunneq ataaseq qaangiuttoq nutaanik ilaasulerluni Danmarkip tungaanut aallaqqippoq.
Nuup Aalborgillu akornanni aasaq manna ataasinngornerit sisamanngornerillu tamaasa timmisartuussisoqartassaaq. Air Greenland imaluunniit Ruby Rejser aqqutigalugu angalanissamut inniminniisoqarsinnaavoq.
