Timmisartumi ilaasut ilaat mekanikeriuvoq

Timmisartumut attartukkamut ilaasut Spaniamiit Glasgowimut ingerlasussat sapaatip akunnerata naanerani piareersimapput timmisartullu qangattarnissaa utaqqiinnarlugu, taavali nalunaarut uuminartoq imaattoq tutsiuppoq:

- Timmisartoq atortumigut ajoquteqarluni nalunaaquttap akunnerinik arfineq-pingasunik kinguaattoortussanngorpoq.

Timmisartup naalaagaata højttalerikkut nalunaarutigaa ajoqutaasup iluarsinissaanut mekanikeri Tuluit Nunaanniit Spaniamut timmisartuunneqaqqaartariaqartoq.

Taavali qaqutigoorluinnartumik pisoqarpoq. Timmisartumut ilaasut ilaat issiavimminit nikuippoq timmisartullu iluarsinissaa neqeroorutigalugu!

Angut timmisartuni mekanikeriunerarpoq timmisartullu naalagaata misissuilluareerluni tamanna ilumoortuusoq uppernarsimmagu angutip suliassani aallartissinnaanngorpaa.

Minutsit arlalialunnguit qaangiummata ajoqutaasoq iluarsineqarpoq timmisartorlu minutsit 35-t qaangiutiinnartut qangattarsinnaanngorluni, siullermik nalunaaquttap akunnerinik arfineq-pingasunik utaqqisoqarnissaanik nalunaaruteqartoqareeraluartoq.

Takornariap ilaasup oqarnera naapertorlugu ilaasunut toqqissiallannarsimavoq ullormi sapiitsuliortoq iluarsaassereerluni nammineq timmisartumut isermat.

- Timmisartumut ikeqqimmat ersaartaanneqarujussuarpoq, ilaasoq oqaluttuarpoq.