Timmisartuaraq Narsarsuarmi minnerliortoq

Timmisartuaraq Cessna – marlunnik issimasulik, Narsarsuarmi sapaatip-akunnerata naanerani mittarfimmut mipiloortariaqarsimavoq.

Timmisartup assakaasui anillanneq ajulermata ajunaalernermut kalerrisaarisoqarsimavoq, Narsarsuarmilu inuttunngeqisumi innuttaasut tamangajalluinnarmik mittarfimmukaasimapput, pisoq malinnaaffigartorlugu. Arfininngormat siggartaassuaq aallartimmat pissanganertik pillugu tikeraat ilaat Mikael Ludvigsen ima oqaluttuarpoq.

- Arfininngormanuna unnukkut arfineq-pingasut qaangeraat ikuallattoqarneranik kalerrisaarussuit nilliagamik, taava inuit arpaliutileriarmata akuliulluta anigatta, sunaaffa timmisartoq assakaasuni singissinnaanagit minniarsarisoq.

- Timmisartoq isiginnaarparput orsussani nungusarujoorlugu qulaavaasoq. Tuliivilluni motoorini qamippai mittarfimmullu tukkami sisuukalaangaatsiarpoq, ajoranilu. Mingajalerluni uertorujussuugaluarpoq sulumminik mittarfik attullatsiarlugu. Iluatsikkamikku inuttai anillakkamik eqqissisimasorujussuupput. Timmisartorlu kaalallallugu misissorujoorpaat.

- Filmiliarisinnaagaluargit minnialermat pissanganermik immiussinngitsoorpunga, Mikael Ludvigsen, Narsarsuarmi tikeraaq oqarpoq.

Jesper Juhl Mittarfeqarfinni pisortaq oqarpoq, timmisartuaraq Cessna assakaasumigut ajoquteqalersimasoq. Qujanartumillu timmisartoq ajorani missinnaasimavoq. Ikuallattoqarsimanngilaq allatulluunniit ulorianavissumik pisoqarsimanani. Ajutoornerit pillugit ataatsimiititaliaq pisumik misissuisussanngorpoq.