Timmisartortitseqatigiiffiik ajornartorisutaat suli qaangiutinngillat
Tassami qullaatsitat sinnikui timmisartut silaannarissarfiinut unissinnaapput tamannalu ilaasunut timmisartortitseqatigiiffinnullu akisoorujussuanngorsinnaasoq, tuluk immikkut ilisimasalik oqarpoq.
Leedsimi universitetimiittoq Stephen Wright timmisartunut immikkut ilisimasaliuvoq, taannalu isumaqarpoq qaqqap innermik anitsisup qullaatsitaasa timmisartortitseqatigiiffinnik ilaasunillu ajornartorsiortitsinerat suli qaangiutinngitsoq.
- Tassami innermik anitsisup qaffaatsitai timmisartut silaannarissarfiinut sunniuteqassapput, tamatumanissaaq aamma qullaatsitat mikisuararsuugaluarunilluunniit. Timmisartut silaannarissarfii qaammatit 18-it qaangiunneri tamaasa nalinginnaasumik misissorneqartarput, misilittakkalli Stephen Wrightip oqarnera naapertorlugu mittarfinni silaannaap mingutsinneqartup qaammatit pingasut-sisamat ingerlanerinnaanni silaannartissarfiit unitsissinnaavai, taamaalillunilu qulaatsitat suli ajornerusumik kinguneqarlutik.
- Stephen Wrightip erseqqissarpaa qullaatsitat sinnikui silaannarissarfinniittut ilaasut isumannaatsuunissaannut ulorianaateqanngimmata, silaannarissarfiillu unittoorsimasut misissorneqartuartarumaartut, taamaattorli timmisartoq mittarfimmiitillugu silaannarissarfiit kissarpallaalerpata imaassinnaavoq timmisartoq utiinnartoq, silaannarmiitillugulu silaannarissarfiit kissarpallaalerpata timmisartoq mittarfimmut qaninnerpaamut ingerlasariaqarluni.
- Tamannalu timmisartortitseqatigiiffinnut ajornartorsiuterujussuuvoq, tassami timmisartoq akulikinnerujussuarmik atorunnaartariaqartassammat, taavalu uannut ilinnullu billettit akisunerulissallutik, tassami timmisartortitseqatigiiffiit aserfallatsaaliinerunerannut aningaasartuutit matussuserneqassammata, Stephen Wright naggasiivoq.
