Timmisartortartoq tupinnaannartumik annappoq
Ajutoornerit pillugit ataatsimiititaliap maannamuugallartoq nalunaarusiaani tamanna takuneqarsinnaavoq.
Islandimi Keflavikimiit Narsarsuup tungaanukartilluni timmisartut allat angallannerat pissutigalugu timmisartortartoq appasinnerusukkoortariaqarsimavoq, naak tamanna kissaatiginngikkaluarlugu. Taamaammat pilersaarutiniit annertunerusumik orsussamik atuinerusimavoq. Timmisartup sarpillip Narsarsuaq qulaavaalermagu ima silarlutsigaaq timmisartortartoq mississaanani.
Taamaammat Kangerlussuup tungaanukartariaqalerpoq, aqqutaanili paasivaa orsussani naammanngitsoq. Ajornartoorluni mittariaqarpoq, timmisartorlu sequmivippoq, timmisartortartorli ajoquserani.
- Kangerlussuarmit kangimut kilometerinik 88-inik ungasitsigisumi, kilometerinillu marlussunnik qutsitsigisuminngaaniit timmisartortartoq sermimut mittariaqarsimavoq, Ajutoornerit pillugit ataatsimiititaliameersoq, Jørn Asmussen, aviisip Politikenip nittartagaani issuarneqarpoq.
Timmisartoq sarpilik qulingiluanik issimasoqarsinnaavoq, timmisartorlu Kangiani Qiterlermi angalanerusarpoq. Piginnittup timmisartoq USA-liaatsillugu ajornartoorluni mippoq. Timmisartup aseqqui suli sermersuarmiipput, taakkuli peerneqarnissaat Namminersortut avatangiisinut immikkoortortaanit kissaatigineqarpoq.
